Loot wa nalapas sa balaod - hepe

Walay nakitang kalapasan sa balaod sa eleksiyon ang hepe sa Cebu Provincial Police Office sa pagpakita ni kanhi provincial police director Sr. Supt. Vicente Loot sa iyang presensiya didto sa Daanbantayan asa mokandidato ang iyang asawa nga si Mayor Ma. Luisa Loot ug anak sa unang bana niini nga si Sun Shimura.

Si Sr. Supt. Carmelo Valmoria nagkanayon nga nasayod si Sr. Supt. Loot nga ma-apeke gyud siya kun may makit-ang ebidensiya nga nalambigit siya sa "electioneering" sa maong lungsod.

Sumala pa ni Valmoria nga bisan gidestino na sa Camp Crame si Loot, apan wala kini did-i nga makapauli sa iyang pinuy-anan sa Daanbantayan.

Matud ni Valmoria nga wala siyay nakitang sayop kun makit-an si Loot sa mga tawo sa Daanbantayan tungod kay tua man manimuyo ang iyang pamilya.

Si Loot nahimong kontrobersiyal tungod sa pasangil sa kanhi direktor sa Cebu City Police Office, ang retiradong si Sr. Supt. Hiram Binatero, nga nakit-an kining nagkuyogkuyog sa mga pulong-pulong sa mga baryo uban sa iyang asawa ug ni Shimura. Kini bisan gibalhin na si Loot sa Camp Crame human sa ika-12 nga Asean Summit niadtong Enero.

Kahinumduman nga si Loot mismo ang mihangyo sa labaw'ng buhatan sa Philippine National Police nga magpabalhin didto sa Camp Crame tungod sa planong paglansar sa iyang asawa ug sa anak niini sa gawas.

Si Loot mihagit kang Binatero sa pagtumbok sa oras ug lugar diin siya nakit-ang miapil sa pulong-pulong ug mipadayag nga mo-resign sa katungdanan kun mapamatud-an sa retiradong opisyal sa kapolisan ang pasangil batok niya.

Gitug-an ni Valmoria nga si Binatero miduaw sa iyang buhatan tulo ka semana na ang nakalabay, apan wala kini mohatag og dugang detalye sa maong kontrobersiya.

Gitataw hinuon niya nga kinahanglang magpabiling neutral ug non-partisan ang mga opisyal ug sakop sa PNP.