Gipatay sa konduktor kay 'wala' mobayad

Patay ang usa ka wala mailhing lalaki human kini dunggaba makadaghang higayon sa usa ka konduktor sa PUJ nga magbiyahian sa Mandaue diha sa dalan Osmeña Blvd.(Jones Ave.) duol sa buhatan sa DOH7 niadtong Huwebes sa gabii.

Ang biktima gibana-banang 30 anyos ang pangidaron, nagsuot og t-shirt ug kolor grey nga karsones wala na makaabot nga buhi sa Cebu City Medical Center gumikan sa kadaghan sa samad dinunggaban nga naangkon sa kalawasan.

Ang gitumbok nga midunggab kaniya mao ang konduktor sa 21B nga PUJ nga si Edmundo Enclamar, taga Estancia, Ibabao dakbayan sa Mandaue.

Ang nagmaneho sa maong PUJ nga gikundoktoran sa suspek giilang si Loreto Lubon, 26, silingan sa suspek.

Sa imbestigasyon sa Homicide Section mitumaw nga ang biktima mikanaog sa maong PUJ dihang gisingil sa suspek sa iyang pletihan.

Apan mitumaw ang mainitong panaglalis tali sa duha ug diha-diha gikatahong gisukmag sa biktima ang suspek hinungdan nga mibunot kini og kutsilyo dayong dunggab sa biktima makadaghang higayon.

Human malup-og ang maong tawo daling miikyas ang suspek samtang si PO1 Emmanuel Blones sa Fuente Osmeña police station nga daling miresponde sa dapit midala sa maong tawo sa CCMC diin kini gideklarar nga patay na.

Hangtud ning pagsulat sa balita wala pa mailhi ang maong tawo samtang gihikay na sa kapolisan ang posibleng pagpasaka og kaso batok sa maong konduktor.