Lakas ug Kampi magsangka sa Cordova

Lakas ug Kampi na ang mag-atbang nga grupo sa lungsod sa Cordova sa umaabot eleksiyon karong Mayo 14.

Kini human nibarug na ang grupo ni Bise-Mayor Danilo Sinugbuhan sa Lakas ng Christian at Muslim Democrats (Lakas-CMD) samtang nagpabilin ang grupo ni Mayor Arleigh Jay Sitoy sa Kabalikat ng Malayang Pilipino (Kampi)

Ang grupo ni Sinugbuhan nanumpa kagahapon sa partido Lakas pinaagi sa district chairman nga si Bokal Gabriel Luis "Luigi" Quisumbing.

Si Sinugbuhan modagan sa pagka-mayor atbang sa amahan ni Sitoy nga si Atty. Adelino Sitoy.

Kauban ni Sinugbuhan ang kompleto niyang grupo nga sila si Atty. Rodrigo Jumao-as sa pagkabise-mayor ug mga konsehal nga sila si Victor Tago III, Cesar Suan, Jonathan Gairanod, Renato Bontol, Arturo Sinugbuhan, Gregorio Jumao-as, Andres Dinoy ug Jennifer Jenison Calimbo.

Pito ka mga incumbent nga konsehal ang anaa kang Sinugbuhan apan dili na makapasubli ang usa nga si Carlos Degamo apan siya ang campaign manager sa grupo.

Nasayran nga si Sitoy ug Sinugbuhan parehong nihural isip sakop sa Kampi sa kauluhan.

Gikatakda nga ang arbitration committee sa Kampi ang mosulbad sa problema sa lungsod sa Cordova.

Apan matud pa ni Sinugbuhan nga dili na sila makapaabot sa gitagal nga Marso 17 nga tigum sanglit dako ang ilang pagtoo nga si Sitoy ang paluyuhan sa Kampi sanglit incumbent ang mayor nga anak sa iyang kaatbang.