Ukay-ukay sa customs gidonar sa nasunogan

Mga pinalusot nga mga Ukay-okay nga nasakmit sa Bureau of Customs ihatag na sa mga biktima sa dakong sunog sa dakbayan sa Mandaue.

Atol sa gipahigayong turnover kagahapon sa buhatan sa Bureau of Customs District Office sa Sugbu personal nga gihatag ni BOC Commissioner Napoleon "Boy" Morales ang 228 ka dagkong bugkos sa mga used clothings kun Okay-okay.

Ang maong mga sinina nga gikarga og truck gidala na ngadto sa DSWD diin saksi niini si 6th District Rep.Nerissa Soon Ruiz, DSWD Operations Chief Vilma Rago, DILG Undersecretary Lito Ruiz ug Cebu Customs Collector Recardo "Boysie" Belmonte.

Atol sa turnover gipadayag ni Cong. Ruiz nga sa dihang iyang nakita ang gidaghanon sa mga nabiktima sa sunog sud sa iyang distrito si Ruiz nakahuna-huna nga manawag ni Collector Belmonte alang sa pagpakisayod kung aduna bay mga okay-okay nga nakumpiskar ang maong buhatan.

Si Belmonte wala magmakuli sa pag-angkon sa ilang nakumpiskar nga 228 ka bails (dagko nga bugkos) niadtong milabay'ng tuig ug mipahibalo nga si Morales maoy pananghiran niini aron kini ihatag.

Si Morales human pahibaw-a ni Ruiz niadtong sa milabay'ng adlaw atol panagtigum sa Phil. Economic Development Forum nga gipahigayon dinhi sa Sugbu mosugot sa hangyo sa kongresista.

Kagahapon sa hapon gihimo ang turn-over ug gikatakda kining ipang-apod-apod sa DSWD ngadto sa mga biktima sa sunog sa Mantuyong ug Guizo.

Gipasabot ni Morales nga kabahin sa "social responsibility" sa BOC ang pagtabang sa mga nanginahanglan dili lang ang pagkolekta og taripa, gani ang BOC usa sa mga nisuporta sa proyektong "Gawad Kalinga."