Retiradong polis 'kuha'ag armas ug mga bala

Usa ka retiradong polis ang gidakop sa mga sakop sa Provincial Intelligence Branch sa Cebu Provincial Police Office human gireklamo sa iyang igsoon nga kanunay magpabuto sa iyang armas.

Ang pagkasikop gihimo kagahapon sa buntag pasado 6 diha sa panimalay sa gikatahapan sa Poblacion West Moalboal.

Gipangulohan ni SPO4 Ernesto Navales ug mga kauban dala ang search warrant nga giluwatan ni RTC Branch 27 Judge Geraldine Faith Econg nga miresulta sa pagkasikop sa gikatahapan.

Ang nadakpan giila sa kapolisan nga si Ambrosio Pableo, Jr., 57, minyo nga usa ka retiradong polis.

Nakuha sa panimalay ni Pableo ang usa ka .45 colt paltik, duha ka magazine, upat ka empty shells sa caliber .30 ug 140 ka buhing bala sa cal. 30 machine gun.

Ang PIB nakadawat og reklamo gikan sa igsoon ni Pableo ug nagkanayon nga perming magpasalba sa iyang armas.

Segun sa report panagbangi sa yuta maoy hinungdan nga nagkabikil ang managsuong Pableo.

Si Pableo nga nahinabi sa Banat News mihimakak sa pasangil batok kaniya.

Siya nitug-an nga pirming magpasalba mao ang security guard nga si Sonny Bullota sa Filmusa Security Agency kinsa nagbantay sa 9 ektaryang luna nga gipanag-iya sa iyang mga ginikanan nga nahimutang sa Cabadiangan Alcantara Cebu.

Ang nireklamo ni Pableo mao ang duha niya ka igsoong babaye nga si Margie ug Virginia.