Noynoy, Manny sa ramos sa Sabado

Pormal nga ilusad sa Barangay Cogon Ramos ning dakbayan sa Sugbu karong adlaw'ng Sabado ang Barangay Development Plan nga proyekto sa nasudnong kagamhanan.

Ang maong kalihukan nga ipahigayun sa alas 4:00 sa hapon diha sa barangay hall niini pagatambungan nila ni Genuine Opposition senatorial candidate Benigno "Noynoy" Aquino, Partylist representative Loreta Itta Rosales ug ang asawa ni senatorial candidate Manny Villar nga si Kongresista Cynthia Villar.

Si Cogon Ramos barangay captain Danilo Alfafara maoy moabiabi sa maong mga bisita inabagan nila ni Mayor Tomas Osmeña, kongresista Raul del Mar ug mga sakop sa konseho sa dakbayan.

Matud ni Alfafara ang ilang barangay maoy ika-upat pa ka barangay dinhi sa dakbayan nga napabarog ang barangay development plan diin ang una niini mao ang Banilad, Barrio Luz ug Ermita.

Gipasabot sa kapitan nga dili masayon ang pagpabarog sa maong programa tungod kay nagkinahanglan man kini og hugot nga kooperasyon gikan sa mga molupyo sa barangay.

Dunay lima ka aspeto ang barangay development plan nga gilangkoban sa economics, infrastracture, environment, development administration ug human development aron mapalambo ang usa ka barangay.