DPWH giduot sa Mandaue sa overpricing sa lamp posts

Ang Department of Public Works and Highways-7 responsable sa pag-overpricing sa mga lamp posts nga anaa gipahimutang sa Mandaue atol sa 12th ASEAN Summit sa milabay'ng bulan sa Enero.

Kini ang paghulagway sa mga opisyales sa kagamhanang lokal sa Mandaue atol sa press conference kagahapon sa hapon nga gitambungan ni Konsehal Carlo Pontico Fortuna, Mandaue City Administrator Serafin Blanco, City Engineer Engr. Hidelisa Latonio ug PR Consultant Jonji Gonzales.

Atol sa press conference giangkon ni Latonio nga siya ang mihimo sa Program of Work sa mga lamp post diin P50 mil ang gisugyot nila nga presyo sa matag usa.

Matud pa ni Latonio ang DPWH-7 maoy mihangyo kanila sa pagsumiter sa ilang POW ug sa ilang pagsanong niini wala na silay kalibutan kun unsa nay nahitabo niini.

Gipasabot ni Latonio nga mokabat lamang sa 131 ka mga lamp posts assembly ang anaa sa ilang POW diin mokantidad lamang sa P6,550,00 milyones nga ipahimutang sa dalan Plaridel, dalan Seno ug U.N. Avenue sa Mandaue.

Ang maong kantidad wala pay labot sa mga galastuhan sa labor sa mga tawo ug ang mga kahimanan sa pagtaod niini.

Gumikan niini, nagduda si Blanco ug ang mga opisyal nga ang DPWH maoy mihimo sa maong overpricing sa maong mga lamp post.

Gipasabot usab ni Blanco nga ang mga lamp posts nga anaa sa POW mao ang mga global type nga lamp post ug dili ang mga lamp posts nga adunay pandong.

Samtang si Fortuna mipadayag nga andam sila nga moatubang sa imbestigasyon nga pagahimoon sa Ombudsman aron maklaro ang tanan.

Ang mga opisyal sa Mandaue giakusahan nga misumiter og POW nga overpricing nga kantidad sa lamp posts ug miabot ngadto sa P224 mil matag usa.