Treasure hunters nangubkob sa Cathedral

Adoration Chapel sulod sa Cebu Metropolitan Cathedral nga gipahigayonan og treasure hunting sa upat ka lalaking trabahante alang sa renovation nabulabog dihang nadiskubrihan sa usa ka security guard sa miaging adlaw.

Si Msgr. Cayetano Gelbolingo, kura paruko sa Cathedral, nga nahinabi sa Banat News niingon human niya masayri ang maong report mimando gilayon siya sa pagpahunong sa pagpatrabaho sa upat ka trabahante.

Giangkon ni Msgr. Gelbolingo nga na bise siya pag-ayo sa milabay'ng adlaw hinungdan nga wala na niya mapugngi ang upat ka trabahante.

Si Msgr. Gelbolingo nanghunaw ug matud niya nga wala gyud siya makaila sa maong trabahante nga gipatrabaho sa retiradong pari nga si Rev. Fr. Dominador Dosdos.

Matud niya nga igo lang siya gipahibalo sa lady guard nga si Myrna Francisco kinsa maoy nakadiskubre sa treasure hunting sa upat ka trabahante.

Si Fr. Dosdos miduol kang Rev. Fr. Gene Hererra ug mihangyo nga ipa-renovate ang sulod ug ipa-'tiles' kay dunay midonar og P100,000 nga usa ka magpapatigayon.

Gibutyag ni Msgr. Gelbolingo nga si Fr. Dosdos maoy nasayod ug nakaila sa maong mga trabahante.

Wala siya magdahum kun mao ba diay ang katuyoan sa upat ka trabahante.

Hagdan

Siya natingala dihang iyang nakita ang dakong lungag sulod sa Adoration Chapel. Sa ilawom sa maong lungag nakit-an ang usa ka hagdanan, electric fan, suga ug balde nga maoy sudlan sa yuta nga kinawot.

Apan dako ang pagtuo ni Msgr. Gelbolingo nga dili pa kaayo lawom ang nakawot sa upat ka trabahante.

Nasayran nga unang gi- renovate ang kisame ug ang kilid sa Adoration Chapel usa na ka buwan ang nakalabay.

Nasakpan

Ang security guard nga si Francisco nga nahinabi sa Banat News mitug-an nga niadtong Sabado sa gabii iyang gipangayoan og duplicate sa yawe ang trabahante apan wala siya hatagi.

Apan sa pagka-Lunes naglisod siya og sulod sa Adoration Chapel kay naka-lock ang pultahan ug gawas pa gibabagan pa gyud og kahoy ang pultahan.

Iyang nadunggan ang tinagulkol diha sa sulod sa Adoration Chapel ug siya nagduda nga dunay gibuhat nga lain ang upat ka lalaki.

Hangtod nga siya nakahukom nga lilion sa kilid ang upat diha sa sulod apan iyang nakita ang dakong lungag.

Matud ni Francisco nga nakasulod siya pagka Martes sa buntag ug iyang nasuta nga nagkubkob diay ang upat.

Iya dayong gipahibalo si Msgr. Gelbolingo sa iyang nakita sa sulod.

Samurai

Si Ramirez mitug-an usab nga sa milabay'ng administrasyon ni kanhi Mayor Alvin Garcia usa ka Hapon ang miduol ug nagpatabang nga mohimo ug pagpamangag sa maong dapit gumikan kay ang amahan sa maong Hapon mitug-an nga anaa niya gilubong ang pito ka espada sa samurai ug mga gold bars ilawom sa kampanaryo sa Cebu Metropolitan Cathedral atol sa ikaduhang gubat.

Sa dihang gibalibaran si Garcia ni Cardinal Vidal, ang Hapon na mismo ang miadto sa palasyo sa Cardinal ug subli kining napakyas sa iyang katuyoan.

Si Fr. Hererra sa iyang bahin nagkanayon nga igo lang siya gipahibalo ni Fr. Dosdos kabahin sa maong plano apan sa pagsugod og trabaho sa upat ka lalaki wala na siya masayod sa sitwasyon niini sulod sa Adoration Chapel.

Mismo si Arsobispo Ricardo Cardinal Vidal misusi kagahapon sa gikawot sulod sa adoration chapel.

Imbestigar

Dihang nahinabi sa mga tigbalita si Cardinal Vidal wala moluwat og daghang tubag sa mga pangutana ug igo lang kining miingon nga dili na kinahanglan nga duna pay polis nga mo-imbestigar.

Iyang gitugyan ni Msgr. Gelbolingo ang paghimo og imbestigasyon ug siya na mismo ang magbuot kun iya ba kining ipa- blotter sa kapolisan.

Gitug-an hinuon ni Vidal nga kaniadto dunay mihangyo kaniya nga kawuton ang sulod sa Adoration Chapel apan wala siya mosugot niini.

Wala hinuon giklaro ni Vidal kun si kinsa ang miduol kaniya ug mihangyo.

Dugang nasayran sa Banat News nga napulo na ka tiil ang giladmon diha sa Adoration Chapel ang nakawot sa upat ka trabahante. Uban sa report ni Bong Soriano ug Romeo T. Limpangog