2 ka babayeng priso gipahilot sa 'kuan'

Duha ka pinirisong babaye sa Argao Police Station mireklamo nga gipahilot sila sa hepe ug gipaapil pa gyud sa gipahilot ang kinatawo niini niadtong milabay’ng buwan.

Si Sr. Insp. Crisanto Duque gireklamo nilang Erlin,54, minyo ug residente sa Suba, Poblacion ug ang mabdos nga si Rosalia, 27, minyo ug residente sa Binlod, Argao. Ang Banat News mipugong lamang sa tinuod nga ngalan sa duha ka babayeng piniriso.

Silang Erlin ug Rosalia parehong nag-atubang og kasong pagpangawat.

Nasayran nga si Erlin nakagawas na sa prisohan sa Argao duha na ka semana ang nakalabay human naaprobahan ang probation niini, samtang si Rosalia nabilanggo niadtong bulan sa Sityembre.

Base sa affidavit nga giluwatan sa duha ka biktima nga gipetsahan og Pebrero 28, 2007, nga matud pa nahitabo ang pagpahilot kanila niadtong Pebrero 13 ala una sa kaadlawon.

Matud pa sa unod sa maong affidavit nga silang duha nahigmata sulod sa detention cell sa dihang si Duque namukaw ug nanugo nga magpamasahe ug mimando nga sila pasak-on sa taas sa police station diin nahimutang ang kuwarto ni Duque.

Dako nilang kahikurat sa dihang ilang nakita nga nag-brief lang si Duque dayong pahilot kanila.

Human mahilot ang tibuok lawas ni Duque buot na unta silang mobiya aron manganaog balik sa selda apan gitawag sila og balik kay naay nakalimtan ug wala maapil og hilot.

"Paghuman namo og hilot sa iyang tibuok lawas wala mi pakanauga niya kay iya man gilak ang pultahan. Niingon siya ayaw una mo kanaog kay duna pay wala maapil ninyo og hilot, iya diay’ng buhi ipaapil og hilot kay gipanuhot, akong gibubu-an og efficacent oil," asoy ni Erlin sa dihang nahinabi sa Banat News kagahapon sa hapon didto sa Argao.

Matud ni Lopez gitawag na usab sila duha ka oras ang nakalabay ug gipahilot na usab sila ni Duque apan niining tungora ang tibuok kalawasan na lang.

Si Supt. Teofilo Siclot, hepe sa Provincial Investigation and Detective Management Bureau sa Cebu Provincial Police Office kinsa mituyo og adto sa Argao miasoy ngadto sa mga tigbalita nga si Duque miingon kanila nga tumo-tumo lang ang maong pamahayag sa duha ka piniriso.

Si Duque gihatagan og lima ngadto sa napulo ka adlaw pagsumiter sa iyang counter-affidavit batok sa maong pamasangil.

Wala gitataw ni Siclot kun marelibohan ba si Duque samtang nagpadayon ang imbestigasyon sa PIDMB, apan magdepende kini ni CPPO chief Sr. Supt. Carmelo Valmoria.

Si Konsehal Mariglen Lucero Buncawil sa Argao miingon nga mopasar sila og resulosyon karong adlawa atol sa ilang sesyon sa konseho aron hangyuon ang Ombudsman Manila nga maoy mohimo og imbestigasyon batok kang Duque.

Si Buncawil nagkanayon nga naalarma ang mga Argawanon sa maong taho.

Si Duque nga nahinabi sa mga tigbalita kagahapon hugot nga mihimakak sa pasangil sa duha ka piniriso.

Sumala pa ni Duque nga ang maong pasangil may kalambigitan sa kasong "dishonesty" nga iyang gipasaka batok ni PO1 Virgilia Albarracin didto sa Provincial Internal Affairs Service. Apan si Albarracin miasoy sa Banat News nga si Duque misang-at na og affidavit of desistance aron dili na madayon ang kaso.

Gitumbok usab niya ang kasuko ni PO1 Vivian Tamayo kaniya tungod sa kanunay niyang pagbadlong niini gumikan kay magsige og ka-late sa trabaho unya dili mag-uniporme.

Si Duque nagduda nga silang PO1 Albarracin ug Tamayo ang nagsugnod sa duha ka babayeng piniriso paghimo og estorya batok kaniya.