2 ka tulisan nadakpan

Arestado ang duha ka gidudahang tulisan ug isnatser diha sa downtown area ning dakbayan human gigukod sa mga estambay human sila makapanulis niadtong Sabado ug Domingo.

Ang nangadakpan giilang sila si Inocencio Flores Oporto,32, taga Basak-Pardo ug Wilmar Ompad Sablas, 32, taga San Isidro II, sa Olango sa dakbayan sa Lapu-Lapu.

Ang duha maoy gipasanginlang mitulis kang April Jane Etom,18, tinun-an ug nagpuyo sa Basak, Mandaue kinsa uban sa iyang mga higala naglakaw diha sa eskina sa Leon Kilat ug P.del Rosario dihang kalit nga gituparan sa mga suspek.

Ang duha gikatahong armado og kutsilyo dayong deklarar og tulis, gikuha sa duha ang cellphone sa biktima ug nangikyas apan nagpakitabang si Etom ug mga higala sa usa ka gwardiya ug maoy nagtabang og gukod hangtud nga nadakpan ang duha ug narekober ang cellphone.

Samtang sa laing hitabo niadtong Sabado sa hapon nasikop usab si Paul San Nicolas Membrellos,18, nga taga Ermita human manglabni og bulawang bracelet sa 62 anyos nga si Elizabeth Bandola nga taga Tangke Dos sa Naga.

Gilabnihan ni Membrellos ang suspek diha sa eskina sa dalan Borromeo ug P.Lopez sa barangay Sto.Niño apan namatikdan siya sa mga estambay ug nadakpan. Narekober usab kaniya ang bracelet nga 24 karat gold.