Suspek sa lugos-patay naghikog

Biyudo nga gipasanginlan ug gilambigit nga maoy milugos ug nipatay sa 12 anyos nga usa ka tinun-an didto sa Tiguib Badian naghikog ug namatay human niinom og hilo kagahapon sa kaadlawon diha sulod sa pansayan sa iyang panimalay.

Ang naghikog ug namatay giila sa kapolisan nga si Eduardo Caballero, 50 anyos, usa ka mag-uuma ug residente sa naasoy'ng lugar.

Siya napalgan sa iyang anak nga si Gemma sulod sa pansayan nga nagbuy-od ug nagbuwa ang baba nga wala nay kinabuhi tungod sa giinom niini nga usa ka matang sa hilo nga makamatay.

Si SPO4 Vicente Suerte, desk officer nga nahinabi sa Banat News niingon nga nagtuo siya nga wala kaantos si Caballero sa iyang konsensya hinungdan nga napugos nalang kini og hikog human niya masayri nga siya maoy gitumbok nga suspek.

"Nakonsensya na tingale ni siya sa iyang gibuhat mao tong naghikog nalang ni siya, niinom og hilo " dugang pa sa maong polis.

Si Insp. Rodrigo Orbigoso, hepe sa maong lungsod kinsa maoy nangunay sa imbestigasyon nakarekober og lima ka pulgada nga kutsilyo sa karaang balay ni Caballero mga 200 metros gikan sa balay sa iyang anak babaye ug susama usab ang gilay-on diin ang bata napalgang patay.

Matud ni Suerte ang kutsilyo nga gikuha ni Orbigoso bisan og gihugasan na kini apan maklaro gihapon ang lama sa dugo diha sa puan.

Dihang gihiling ang patay'ng lawas sa biktima nasuta nga dunay bun-og timaan nga nisukol kini sa suspek.

Ang naghikog gitumbok sa usa ka witness human ang lima ka lalaki nga giimbitar sa kapolisan pulos negatibo ang resulta human sa pagsukit-sukit sa kapolisan.

Siya maoy katapusang nakit-an nga naglakaw paingon sa crime scene sa wala pa mapalgi ang patay'ng lawas sa 12 anyos nga biktima.

Niadtong Biyernes sa buntag ang biktima nieskuyla sa Sohoton Elementary School sa kasikbit nga barangay.

Apan niabot ang kagabhion ang biktima wala pa gyud mauli sa iyang pinuy-anan. Sabado na sa buntag pasado alas 9 nakit-an nga patay na sa kasagbutan sa Tiguib ug dihay daghang samad dinunggaban sa tiyan, liog ug paa kinsa nagsuot pa sa iyang uniporme sa eskuylahan apan ang underwear diha na sa ulohan duol sa bag sa biktima.

Si Dr. Samsom Dela Peña nikompirmar nga gilugos ang biktima base sa nakitang gisi sa iyang genitals.

Human masayod si Orbigoso sa pagkalambigit sa suspek mihimo gilayon og background check ngadto sa suspek ug nasuta nga dunay pending nga kasong attempted rape sa korte pipila na katuig ang nakalabay.