'Asset' sa ISAFP gidakop sa CIDG

Usa ka nagpailang agent sa Intelligence Service of the Armed Forces of the Philippines (ISAFP) ang gidakop human makuhai og duha ka armas sa mga sakop sa CIDG7 kagahapon sa buntag.

Si Chief Inspector Rex Derilo miila sa suspek nga mao si Durbin Balila,53, giingong namaligya og armas si Balila pinaagi sa 'package deal.'

Ang package deal naglangkub sa armas ug ubang dokumento dala na ang mission order.

Ang Military Intelligence Group sa AFP dihang gipangutana sa CIDG kung ila bang sakop si Balila wala siya angkuna sa maong buhatan sumala pang Derilo.

Armado og search warrant nga giluwatan ni RTC branch 9 Judge Geraldine Faith Econg gironda sa CIDG ang balay niini sa San Remigio

Nakuha sa kapolisan ang usa ka kalibre 45 pistola nga may unom ka buhing bala, usa ka Ingram ug mga dokumentos nga gidudahang mga mini.

Si Balila miangkon nga sakop sa ISAFP ug niadtong 1972 siya nasulod sa Army apan pag-abot sa tuig 1980 ni-resign siya.

Nakuha usab kaniya ang usa ka ID sa ISAFP nga gilagdaan sa kanhi Batallion Commander sa 78th IB nga si Jonas Sumagaysay.

Dugang pa niya nga duna siya'y gibantayang Syrian national nga nanag-iya og kabtangan sa Tabogon ug San Remegio.