Duha ang gipuspusan namatay

Namatay ang usa ka 37 anyos nga lalaki human kini bunali og botelya sa softdrink sa ulo ug gihapak pa gyud og bato ang nawong sa iyang gikainom diha sa Basak Sibonga pasado alas 5 niadtong Sabado sa hapon.

Ang biktima giila sa kapolisan nga si Jacinto Tormes, ulitawo, residente sa sama nga dapit.

Samtang ang gitumbok nga suspetsado naila nga si Aurelio Andraque, 33, minyo, nagpuyo ra usab sa maong dapit.

Base sa imbestigasyon sa kapolisan sa Sibonga ang biktima ug ang suspetsado uban sa laing usa ka kauban nag-inom og ilimnong makahubog sa usa ka Cooperative pipila ka metros sa Barangay Hall.

Sa ilang panag-inom nitumaw ang panaglalis sa tali sa biktima ug sa suspek. Ang Suspek nikuha og basiyo nga botelya sa softdrink ug gibunal ngadto sa ulo sa biktima.

Dihang natumba ang biktima dili pa igo ang suspek mikuha og dakong bato ug gihapak sa nawong sa makadaghang higayon.

Ang biktima daling gihatod sa Deiparine Medical Clinic sa Sibonga apan patay nang naabot sa maong tambalanan.

Samtang si Andraque human sa krimen bulontaryong mitahan sa tanod ug gi-turn over sa buhatan sa kapolisan.

Samtang sa laing bahin usa ka lolo ang namatay human gibunalan og kawayan diha sa ulo sa iyang gikainom sa miaging adlaw pasado alas 2 sa hapon didto sa Sitio Upper Can-ugbong Western Poblacion Poro Isla sa Camotes Cebu.

Ang namatay giila sa kapolisan nga si Pabroa Gonzales, 71 anyos ug nagpuyo sa maong lugar ug ang gitumbok nga nipatay sa biktima mao si Joselito Cañete, 46, minyo ug residente sa samang dapit. Ang duha naglalis ug ang suspetsado mikuha og kawayan dayong bunal sa ulo sa biktima.

Samtang ang suspek daling misibat human sa krimen ug padayon kining gipangita sa kapolisan.