Briton nanagmal sa kapuyo gidakop

Usa ka Briton ang gidakop sa mga sakop sa Mobile Patrol Group human ireklamo og pagpanagmal sa iyang 39 anyos nga kapuyo diha sa ilang panimalay sa dalan B.Aranas sa Duljo-Fatuma ning dakbayan kagahapon sa kaadlawon.

Ang gidakop giilang si Allan Philip Gaskell,48, usa ka Briton ug nagpuyo sa Button,Manchester sa Englatera human kini ireklamo og pagpanagmal sa iyang kapuyo nga si Glad (tinuod nga ngalan gipugngan).

Base sa report nga nakuha diha sa Women's Desk sa CCPO, ang biktima misaysay nga ala-una sa kaadlawon dihang miabot ang suspek ug iya kining giablihan aron makasulod.

Nianang tungura nagkasumpaki sanglit nianang pagkagabii nagkalalis na silang daan ug dihang nakasulod na ang Briton gikatahong gikuha niini ang pungpong sa yawe ug gilabay kini ngadto sa nawong sa babaye.

Naigo ang biktima diha sa nawong sa biktima nga nakaingon sa pagkaigo sa walang bahin sa iyang mata, kilay ug ngabil. Tungod niini gidakop nila ni PO3 Leopoldo Sumalpong ug PO1 Michael Estrosas sa MPG car 009 ang suspek ug gidala sa buhatan sa Women's Desk sa CCPO.

Gisuwayan og kuha sa Banat News ang habig sa langyaw diha sa iyang karsel apan wala kini motingog ug miipon sa pundok sa ubang mga priso.