Suspek pagpatay sa 17 anyos mitahan

Mitahan sa iyang kaugalingon ang usa ka suspek sa pagpatay sa 17 anyos nga lalaki nga nahitabo sa sitio Bomba sa Lusaran niadtong milabay'ng Biyernes sa kaadlawon.

Ang suspek nga mitahan giilang si Wendel Dorado,hingkod ang panuigon ug helper sa iyang uyoan nga dunay farm sa mga manok pangsabong diha sa Lusaran.

Ang suspek maoy gitumbok nga mipatay kang Junrey Ardines,17, kinsa gipusil makausa diha sa dughan samtang naglakaw padulong sa Cambinocot uban sa iyang higala.

Sa wala pa patya ang batan-on, mihapit kini uban sa iyang higala sa tindahan sa iyang iyaan diin gikatahong nanag-inom ang duha ka tawo, usa niini giingong ang suspek.

Ang biktima gikatahong miestorya sa mga suspek kabahin sa mga reklamo sa mga silingan nga dunay mga tawong magpunay og pabuto og armas diha sa ilang dapit.

Apan human niadto milakaw ang biktima ug iyang kauban ingon man usab ang mga suspek apan dangtan pila ka gutlo gipusil ang biktima.

Ang suspek mitahan human kumbinsira sa iyang uyoan nga si Lope Dorado human gikatahong gipamatay sa kabanay ni Ardines ang mga manok nilang igtatari nga mokabat og linibo ang kantidad matag usa diha sa Lusaran.



Ang uyoan sa biktima mitawag sa buhatan sa Regional Investigation and Intelligence Division aron pasurenderon ang iyang pag-umangkon nga si Wendel. Sila si PO2 Dindo Tajanlangit ug PO1 Januario Miro sa RIID maoy mikuha sa suspek diha sa sitio Pilit sa Tawason sa dakbayan sa Mandaue.

Si Dorado dihang kuhaan unta og pamahayag sa mga tigbalita miangkon nga dunay atraso kaniya ang biktima apan dihang giduol sa usa sa iyang mga kabanay nga mihunghong kaniya nausab ang tonada sa pag-estorya niini ug miingon nga motingog lang siya kun duna nay abogado.

Ang Homicide Section gikatakdang mopasaka og kaso batok kang Dorado karong adlawa.