Motor nadaro sa multicab

Kritikal ang kondisyon sa duha ka tawo human sa nahitabong panagbangga sa motorsiklo ug multicab nga pasaheroan diha sa Sitio Bahak, Barangay Poblacion lungsod sa Lilo-an kagahapon sa buntag.

Usa sa biktima giila sa mga polis nga si Romeo Vistar Jr. taga Barangay Nangka sa maong lungsod apan wala mailhi sa mga polis ang ngalan sa back rider ni Vistar kinsa naangol usab sa maong insidente.

Ang duha parehong nakaangkon og grabeng kadaot sa sa ilang mga lawas.

Si PO3 Ramir Maglasang traffic field investigator nagkanayon kagahapon nga base sa gipahigayong imbestigasyon ni PO2 Rutchel Jugalbot Vistar nagbiyahe gikan sa Consolacion paingon sa Lilo-an.

Usa ka pasaheroang multicab nga gimaneho ni Jim Ranin Rallos nagbiyahe sa lahing direksiyon ni Vistar gikan sa lungsod sa Consolacion ang gikabangga niini.

Matud ni Maglasang nga kusog kaayong mipadagan sa iyang motorsiklo si Vistar hinungdan nga wala na niini makontrolar ang manobela ug mibangga ngadto sa multicab.

Ang laing motorsiklo nga nagsunod ni Vistar ang mibangga usab ngadto kaniya.

Gikataho nga ang duha ka drayber sa nahisgutang mga motorsiklo ang parehong ubos sa ilimnong makahubog.

Si Vistar ug ang iyang back rider daling gisakay sa ambulansiya sa lungsod og gidala diha sa Vicente Sotto Memorial Medical Center ning dakbayan.