Magsuon gidunggab sa sakop sa Tau

Duha ka managsuon ang parehong nalandig sa tambalanan human sila panunggaba sa pundok sa mga batan-ong ilang gidudahang mga sakop sa Tau Gamma Phi fraternity diha sa eskina sa Katipunan ug F. Llamas sa Tisa kagahapon sa kaadlawon.

Ang nadunggaban giilang sila si Dino Villa Gonzalo, 20, ug Bueno Villa Gonzalo, 22, pulos mga tinun-an ug residente sa nahisgutang lugar.

Gitumbok nga midunggab sa mga biktima giilang sila si Wilfredo Nacua ug usa ka giilang Michael Budlat ug mga wala mailhing mga kaubanan nga gidudahang mga sakop sa Tau Gamma Phi.

Mitug-an ang mga biktima sa Homicide Section nga kauban nila ang ilang mga higalang babaye ug lalaki diin usa kanila nga giilang si Marni John Silagan mipalit og sigarilyo sa usa ka tindahan dihang kalit silang giduol sa mga suspek.

Walay daghang pangutana gitabangan og kulata ang managsuon nga miresulta sa ilang mga bun-og ug usa sa mga suspek ang mibunot og kutsilyo dayong dunggab sa duha.

Si Dino naigo diha sa likod samtang naigo usab si Bueno diha sa tuong dapidapi ug walang bukton. Ang mga suspek daling nangikyas palayo sa lugar samtang gidala sa Cebu City Medical Center ang mga biktima.

Gitino pa sa kapolisan kung miyembro ba sa ribal nga grupo ang mga biktima kasamtangan pa usab ang gipangita ang mga suspek.