Mga cellphone butangan na og sticker

Giawhag sa konseho sa siyudad sa Sugbu ang National Telecommunication Commission (NTC) nga mohimo og lig-ong programa aron malikayan ug masumpo na ang pagpamaligya og mga kinawat nga cellphone ingon man mga handset dinhi sa nasud ilabina gyud dinhi sa dakbayan.

Gi-apil usab sa gipangamahanan nga resolusyon ni konsehal Arsenio Pacaña nga apilon ang pagpangita og paagi nga makontrolar usab karon ang grabeng smuggle kon pagpalusot og mga cellphone dinhi sa nasud.

Si Pacaña nakahuna-huna sa maong pamaagi human gitinguha sa NTC nga ma-rehistro ang tanang mga sim cards sa tanang mga prepaid customer sa usa ka telecommunication firm nga gitahasan sa NTC.

Ang tanang cellphone ug handset nga ipamaligya butangan na unya og registration stickers pagmatuod nga dili kinawat ug pinalusot ang maong mga butang.

Ubos sa maong gitun-an karong sistema sa NTC obligado na unya ang mga tindahan og cellshop nga mobayad og P75 alang sa sticker sa ilang giparehistro nga mga unit.

Apan nitumaw usab karon ang mga kabalaka sa mamahimo unyang epekto niining sticker plan nga planong ipatuman sa NTC nga posibling makadugang lang unya kini og bug-at sa mga kustomer ilabina kay ang maong dugang gastohan posible man nila kining ipasa ngadto sa mga kustomer.

Tungod niini gusto lang sa konsehal nga makapaniguro nga mapanalipdan ang interes sa publiko batok sa pagpalusot ug pagpamaligya og mga kinawat nga cellphone ingon man usab siguradohong dili ipasa sa kustomer ang 75 pesos nga dugang bayranan sa paglukat og sticker sa unit sa cellphone.