Kargador nalumos sa dam

Usa ka 36 anyos nga kargador sa Pasil ang namatay human kini malumos sa dam sa Metro Cebu Water District sa Buhisan niadtong Biyernes sa hapon.

Patay nang napalgan ang biktimang si Trocio Sandallo, 36, taga Sitio Kalumboyan sa maong barangay nga nakit-an kagahapon ra sa buntag sa mga sakop sa Emergency Rescue Unit Foundation.

Matud pang Buhisan barangay Kapitan Rustica Asid sa mga tigbalita nga si Sandallo uban sa iyang higala nag-inom sa maong dam ug namingwit og isda.

Gibadlong na ang duha sa gwardiyang si Marissa Cabajar tungod kay kusog ang bul-og sa tubig nga posibleng makaanod kanila.

Apan giingong wala manumbaling ang duha ug diha nangagi sa luyong bahin sa dam anha agi sa sitio Santolan. Giingong mitabok ang biktima sa tubig sa pagtuong mabaw ra kini bisan pa sa pagbadlong sa kauban apan wala kini mopatuo hangtud nga naunlod kini ug wala na igkita.

Gikatahong alas 12 pa sa udto nawagtang ang biktima apan alas 3 na sa hapon masusi sa ERUF. Kagahapon napalgan ang lawas niini diha sa pukot nga nag-ali sa ilawom aron salaon ang tubig nga mosulod sa dam.