Gibag-o na ang numero sa presinto sa South

Kalibog ug kahasol ang posibling masinati sa tanang mga rehistradong botante sa habagatang distrito dinhi sa dakbayan sa Sugbu atol sa eleksyon karung petsa 14 sa bulan sa Mayo.

Mao kiniy mga kabalaka nga gipadayag ni City Election Officer Marchel Sarno human sa mga kausaban nga gipatuman sa ilang ulohang buhatan sa Comelec sa south district dinhi sa dakbayan.

Gibutyag ni Sarno dihang nahinabi sa Banat News nga atol sa eleksyon karong Mayo bag-o na ang numero sa tanang mga presinto sa South district nga magsugod na unya gikan sa 1,139 ang precinct number-1 kaniadto pataas.

Matud ni Sarno gituyo kini aron paglikay sa mga kalibog aron dili na maduha ang presinto uno dinhi sa dakbayan, ang presinto uno sa north ug laing presinto uno sa south district nga maoy nahitabo sa mga nilabay'ng eleksyon.

Matud ni Sarno makahatag kini og kalibog ilabina niadtong mga tawo nga wala makahibawo nga dunay duha ka distrito ang dakbayan sa Sugbu sama sa nitumaw nga kontrobersya niadtong milabay'ng 2004 presidential election kabahin sa presinto uno sa north district sa Lahug ug laing presinto uno sa south district sa Pardo.

Nunot niini giawhag ni Sarno ang mga botante ilabina sa south district nga mobisita sa ilang buhatan sugod karong Lunes aron tan-awon ang ilang i-plastar nga voters list sa bulletin board sa ilang buhatan sugod karung Lunes aron mahibaw-an niini kon unsa ang numeru sa mga bag-ong presinto niini.

Ang south district dunay 1,070 ka mga clustered precinct ug samtang ang north district dunay 1,264 ka mga presinto.