Upat ang gipamatay sud 8 ka oras

Upat ka tawo ang gipamusil patay ug lain usa ang naangol sa managlahing insidente sa sulod sa walo ka oras dinhi sa dakbayan sa Sugbu.

Unang gipatay mao ang gwardiya sa Lighthouse Restaurant sa dalan Gen.Maxilom Ave. sa barangay Zapatera ning dakbayan nga giilang si Gerardo Cuerda,41, minyo ug sakop sa GDS Security and Detective Agency.

Sumala pa sa mga nakasaksi, duha ka wala mailhing mga lalaki nga nagsakay og usa ka Honda dream nga motorsiklo ang mipusil sa biktima.

Ang mga suspek parehong nagsuot og helmet ug ang backrider nga maoy mipusil nagsuot og maong nga jacket ug karsones nga maong.

Matud pang SPO2 Rey Cuyos sa Homicide Section sa pakighinabi sa Banat News ang biktima gikatakda na untang mouli niadtong tungura ug nagpaabot nalang sa morelibo kaniya nga si Wilson Belang Prospero,34, nga makailis diha sa sulod.

Samtang nagpaabot, giingong miabot ang mga suspek ug ang backrider mikanaog dayong duol ngadto sa biktima ug walay daghang pangutana mipaulan og bala sa biktima.

Ang biktima naigo katulo sa ulo ug kaduha sa dughan nga maoy gituuhang nakaingon sa iyang kamatayon. Ang mga suspek daling miikyas sa direksyon sa Carreta.

Matud pang Inspector Mario Monilar,hepe sa Homicide Section posibleng may gikaaway nga nagdumot ang biktima ug mibawos sanglit mismong ang kauban niini mitug-an nga mipahibalo kaniya si Cuerda nga duna siyay napusilan kaniadto.

Si CCPO director, Sr.Supt. Patrocinio Comendador nibutyag nga ila pa usab gisubay ang dili kumpirmadong report nga igsuon sa namatay ang tulisan nga si Henry Cuerda nga usa sa mga mitulis sa LBP-Bogo niadtong 2005 nga nakasakiyo og P9.4 milyones.

Kapin usa ka oras ang milabay, duha ka mga lalaki usa kanila menor de edad ug mao ray nabuhi ang gipamusil sa eskina sa dalan F.Gonzales ug Lincoln sa barangay San Roque ning dakbayan.

Ang namatay giilang si Junjun Jumao-as alyas,Florante, hingkod ang panuigon ug residente sa maong lugar samtang ang nakalingkawas mao si Jose Bascones,16, helper sa suspek.

Sumala pa sa menor, padulong na sila pauli ug matulog sa ilang kariton dihang kalit nga mipaka ang nagsunod nga buto sa armas hinungdan nga midagan siya palayo sa dapit ug diha lang niya nabatyagan nga naigo siya dihang misakit ang iyang walang bitiis.

Si Jumao-as nakit-an nalang nga nagkadugo ug nagbuy-od diha sa dalan ug ang duha daling gidala sa Cebu City Medical Center apan gideklarar si Jumao-as nga dead on arrival.

Si Jumao-as dunay igo sa ulo ug duha ka igo sa dughan nga gituuhang nakaingon sa iyang kamatayon. Wala pa matino sa kapolisan kung kinsa ug unsay motibo sa pagpamanhig.

Nianang pagka-ala una sa kaadlawon, lain na usab ang gipusil patay diha sa sitio Bomba sa barangay Lusaran diin usa ka Junrey Ardines,17, ang gipusil sa duha ka wala mailhing mga lalaki.

Matud pa sa kapolisan ang biktima uban sa iyang higalang si Julio Cayunda padulong sa Cambinocot human kini mananghid sa inahang si Ofelia nga adto siya matulog sa balay ni Cayunda.

Sa ilang paglakaw mihapit pa ang biktima sa tindahan sa iyang iyaan nga si Shirley Arconada diin ang mga suspek kasamtangang nanginom og bino.

Gikatahong nadunggan ang biktima nga nakig-estorya sa mga suspek nga nagpahibalong masuko ang mga residente kung dunay magpabuto og armas, apan wala pa maklaro sa kapolisan kung ang mga suspek gipasanginlan ba sa biktima nga maoy kanunay'ng magpabuto diha sa maong dapit.

Dihang nanglakaw na ang biktima dungan nga naglakaw sa grupo sa mga suspek, usa sa mga suspek ang mibunot og armas dayong pusil makausa ka higayon sa tuong dughan sa biktima dayong nanagan palayo sa dapit.

Ang biktima gidala sa CCMC apan gideklarar kining dead on arrival.

Pagka-alas singko sa kaadlawon kagahapon, usa ka mamuhatay og uling nga mag-uuma sa sitio Cabatbatan sa barangay Pamutan sa bukirong barangay sa dakbayan ang gipusil patay.

Ang biktima giilang si Patricio Ibonalo,50, residente sa maong dapit ang napalgang nabulit og samad pinusilan ang ulo ug kalawasan agi sa gituuhang .30 caliber carbine rifle.

Matud pang Cuyos, ang igsuon sa biktima nga usa ka tanod nga si Serafin nakadungog sa singgit sa biktima nga nangayo og tabang maong dali niya kining gisubay.

Diha na lang niya kini mapalging nagbuy-od sa may ulingan nga nabulit og samad pinusilan, duna siya'y tulo ka pinusilan sa ulo, upat sa dughan, bukton ug mga bitiis nga nakaingon sa iyang kamatayon.

Apan wala na diha ang suspek. Nagtuo si Cuyos nga may kalambigitan sa mga nangaging kaaway sa biktima ang motibo sa pagpatay kaniya sanglit giingong daghang kontra si Ibonalo diha sa ilang barangay hinungdan nga mibalhin kinig puyo sa Candulawan,Talisay.

Niadtong Oktobre 30 sa milabay'ng tuig lang kini mibalik og puyo diha sa Pamutan dihang gitigbas sa iyang silingan sa Talisay.

Nakuha diha sa crime scene ang lima ka basiyo sa .30 caliber nga bala sa carbine.

Nanawagan karon si Comendador sa mga posibleng testigo sa maong mga krimen sa pagtabang sa kapolisan pagsulbad niining mga pagpatay.