Upat ka balay ugdaw sa sunog

Upat ka balay ang naugdaw diin mikabat sa P150 mil ang danyos niini sa nahitabong sunog sa milabay'ng adlaw diha sa Barangay Gawi lungsod sa Oslob.

Ang maong mga balay gipanag-iya nila ni Wenceslao Comahjes Vequiso, Solidad Vequiso ug Josefa Vequiso kinsa maoy tag-iya sa duha ka balay.

Dali kaayong gikaon sa kalayo ang upat ka balay tungod kay pulos kini gigama sa gaay nga materyal ug mihuros usab ang kusog kaayong hangin hinungdan nga nanga-ugdaw gyud kini.

Base sa taho nga nadawat sa kapolisan nga alas 6:30 sa buntag sa milabay'ng adlaw nagsugod ang sunog ug 30 minutos gikan sa pag-alarma sa kabomberohan nakontrolar ang kalayo.

Ang firetruck sa Boljoon ug Dalaguete maoy daling nakaresponde sa sunog.

Base sa imbestigasyon ni Senior Fire Officer I Jaime Soycano sa Oslob fire station nga nagsugod ang kalayo diha sa balay ni Wenceslao diin ang 16-anyos nga anak niining babaye nag-init og tubig gamit ang kahoy ug mibiya kini sa kusina tungod kay nanglaba kini.

Ang anak ni Wencelao wala na makuhai og pamahayag tungod kay gibati pa kini og kahadlok sa hitabo.

Gituhoan sa mga polis nga nangahulog ang sugnod nga kahoy diha sa sawog sa balay nga hinungdan sa sunog.