Leyson nanghinaot nga ma-mayor sa Talisay

Si konsehal Gabriel Leyson sa dakbayan sa Sugbu ug kandidato sa pagka-mayor sa dakbayan sa Talisay nagkanayon nga ang Talisay nabiyaan na sa ubang dakbayan kabahin sa pag-uswag sa ekonomiya.

Matud ni Leyson nga kung mahatagan siya og higayon nga mahimong sunod nga mayor sa Talisay iyang tinguhaon nga magmalamboon ang ekonomiya sa siyudad.

Sa gipahigayong 888 news forum diha sa Marco Polo hotel kagahapon, si Leyson mikompara sa Talisay ngadto sa silingan niining dakbayan diin ang kahimtang sa Talisay karon mao ang kahimtang sa Cebu City niadtong 1988.

Si Leyson nagkanayon nga gamay lang ang budget sa Talisay kompara sa ubang dakbayan ug wala gani kini atraksiyon sa mga turista diin kaniadto usa man unta kini sa tourist attraction sa probinsiya.

Niining bag-o lang ang Talisay mipasigarbo sa ilang Inasal Festival para pag-attract og mga turista apan matud sa konsehal nga adunay mga lugar gawas sa Talisay nga dunay mga lamiang litsong baboy.

Ang karon ug ang milabay'ng mga nangulo sa siyudad napakyas sa pagsulbad sa problema sa drainage system.

Ang sapa sa Mananga nagpakita og kapiligroso sa mga residente diha sa lugar ug ang dakbayan nakasinati og mga baha ilabi na panahon sa ting-uwan.

Si Leyson midungag nga kung dili mahatagan og dinaliang pagtagad sa kagamhanan sa siyudad ang maong problema posibleng ang Talisay maparehas sa dakbayan sa Ormoc.

Si Konsehal Alan Bucao, Ignacio "Iñaki" Jordana ug Emil Go sa dakbayan sa Talisay gikabig ni Leyson sa iyang kampo lakip na sila si Ricky Aznar, Gerson Lacida, Nick Hermosa, Yul Julia ug Jojo Bacaltos.

Wala pa ibutyag ni Leyson ang iyang running mate apan nagkanayon kini nga posibleng iyang pilian sila si Bucao, kanhi mayor Deliah Tiu ug kanhi Bise mayor Lanie Abarquez nga maoy mahimo niyang bise mayor.