Manunggab unta, mao nuoy napatay

Usa ka 37 anyos nga lalaki ang gitigbas patay sa iyang silingan sa miaging adlaw gamit ang pinuti human sa ilang panag-inom og ilimnong makahubog uban ang uyoan sa biktima.

Segun sa report sa kapolisan ang insidente nahitabo alas 3:00 sa miaging hapon sa Sitio Tabay Daan Dos, Poblacion Asturias.

Ang gitigbas ug namatay giila sa kapolisan nga si Benito Aron, minyo, residente sa nahisgutang dapit.

Samtang ang gitumbok suspek nga mitigbas sa biktima mao si Benito Hepuit, 28, minyo ug silingan sa biktima.

Si P/Insp. Noli Cernio nga nahinabi sa Banat News miingon nga ang biktima uban sa iyang uyoan nga si Miguel Pitogo ug ang suspek gikan nag-inom sa silingan barangay.

Sa ilang pagpamauli nitumaw ang panaglalis tali sa biktima ug sa uyoan hangtod nga midako.

Sa tanto nilang panaglalis ang biktima nibunot og bronze nga kutsilyo ug buot untang dunggabon ang uyoan apan ang suspetsado nga si Hepuit misuway og uwang ug mao hinuon ang naigo ug nadunggaban diha sa buko-buko.

Matud ni Insp. Cernio nasuko ang suspetsado ngadto sa biktima human nasamdan nikuha og pinuti og gitigbas ang biktima kaduha ka higayon diha sa ulo ug buko-buko.

Ang biktima daling gidala sa Balamban District Hospital aron patambalan pero gidiklarar sa mga doktor nga patay nang naabot sa nahisgutang tambalanan.

Si Hepuit misurender sa niresponding kapolisan ug gidala usab sa district hospital apan gibalhin sa Vicente Sotto Memorial Medical Center sa dakbayan sa Sugbu.

Nahibaw-an usab ni Cernio ang tulo nga nalambigit sa maong hitabo suod nga higala.

Si Cernio dili pa makasulti kung unsay sinugdanan sa ilang panaglalis.

Ang gigamit nga hinagiban narekober sa kapolisan sa crime scene ug ila kining gihipos para himuong ebedinsya.

Hinuon gibutyag ni Insp. Cernio nga luwas na sa piligro nga kahimtang si Hepuit ug inig gawas sa hospital ibalhog sa prisohan samtang giandam na usab nila ang tukmang kaso nga ipasaka batok sa gikatahapan.