Nakiglalis sa drayber kauban maoy gipahimungta'g dunggab

Namatay ang usa ka trabahante sa pier sa Sugbu human kini mabiktima sa pagpanunggab sa iyang silingan nga kauban usab sa trabaho sa miaging gabii sa Basak Mercado sa barangay Basak, dakbayan sa Lapu-Lapu.

Ang namatay mao si Joel Bartolo, 28 anyos, minyo ug ang nagdunggab mao si Primitivo Parba, hingkod ang panuigon, minyo ug pulos lumolupyo sa maong dapit.

Sa imbestigasyon ni PO3 William Humoc sa homicide section maoy nasuta nga ang duha pulos hubog nga nagsakay og traysikol pauli sa ilang panimalay.

Matud pa ni PO3 Humoc nga ang suspetsado ug ang drayber sa traysikol maoy naglalis dihang wala magkasabot sa plitehan.

Samtang nagpadayon ang panaglalis ang biktima daw wala lamang manumbaling milakaw pauli sa ilang panimalay ug gibiyaan ang suspek.

Ang suspetsado nasuko sa gihimong pagbiya kaniya nagdali usab sa pagsunod sa biktima ug walay panaganang gihansakan sa kutsilyo ang kalawasan ni Bartolo makadaghang higayon.

Gidala unta ang biktima sa Mactan Community Hospital sa maong dakbayan apan patay na kini nga nahidangat sa maong tambalanan.

Ang suspetsado kinsa dali usab nga nakasibat pahilayo sa maong dapit ang padayon na karong gipangita sa kapolisan.