Gipatay atubangan sa asawa

Patay ang usa ka lalaki human kini pusila sa atubangan sa iyang asawang mabdos diha sa First Street eskina sa dalan A.S. Baklig Ave. sa Pier 6 kagahapon sa buntag.

Ang namatay giilang si Roland Rico Teves,34, residente sa San Carlos Heights sa barangay Quiot ning dakbayan.

Ang biktima uban sa iyang 29 anyos nga kapuyo diha sa pantalan aron sugaton ang usa ka tawong gikasabot diha sa Pier 6.

Matud pang SPO3 Zenaido Pastorfide, imbestigador sa Homicide Section sa Banat News base usab sa pamahayag sa kapuyo sa biktima mipakuyog kini kaniya aron sa pagsugat sa usa ka tawo diha sa maong dapit.

Luwan sa ilang motorsiklo giadto sa magtiayon ang pantalan apan gikatahong pag-abot didto wala pa diha ang tawong ilang sugaton maong nagdesisyon silang mangaon lang una.

Human mangaon mibalik sila sa ilang agi aron sugaton ang ilang gikasabot apan gikatahong samtang nagdagan ang motorsiklo pag-abot sa maong eskina nakadawat og text si Teves maong mihunong kini sa pagmaneho aron tubagon.

Ang kapuyo niini mikanaog usab aron tarungon ang iyang karsones, apan diha-diha usa ka wala mailhing lalaki ang miduol sa biktima ug mipusil kaniya makadaghang higayon.

Dali usab nga milakaw padulong sa direksyon sa kilid sa usa ka wala mahuman nga hotel tupad sa usa ka dakong department store sa maong dapit ang suspek ug wala na usab igkita.

Nagtuo si Pastorfide nga dunay kaubang back-up ang suspek nga nagpaabot didto ug daling misutoy human sa pagpamusil.

Ang biktima daling gidala sa iyang kapuyo ngadto sa Cebu City Medical Center apan gideklarar kining dead on arrival.

Ang biktima nakaangkon og tulo ka samad pinusilan sa iyang tuong lawas nga lapos-lapos ang igo ug usa ka igo sa tangkugo nga maoy gituuhang hinungdan sa hinanali niining kamatayon.

Narekober diha sa crime scene ang tulo ka basiyo sa kalibre 45 nga bala, usa ka slug ug usa ka medium size pack nga gituuhang shabu nga giputos og usa ka papel.

Wala pa matino sa kapolisan kung ang maong shabu iya sa biktima o ba kaha sa suspek. Apan si SPO2 Desiderio Mendaros nagkanayon nga ila usab nga subayon ang anggulo sa drogas.