Mubo'ng program sa charter

Usa ka hamubong programa ang giandam sa kagamhanan sa siyudad sa Sugbu alang sa ika-70 ka tuig nga selebrasyon sa Cebu City Charter Day karong adlawa.

Agi og pagbukas sa maong selebrasyon usa ka Santos nga Misa ang ipahigayon karong alas 7 sa buntag diha sa atubangan nga bahin sa may Pahina Central Fire Station sa Natalio Bacalso Avenue nga dumalahon ni Rev. Fr. Ramon Espuelas.

Human sa Santos nga Misa isunod ang flag raising dungan ang pagkanta sa nasudnong awit nga pagasundan sa hamubong mensahe nila ni Bise Mayor Michael Rama ug Mayor Tomas Osmeña.

Apil sa gipahinungdan sa maong Santos nga Misa si Don Vicente Rama ang giilang amahan sa dakbayan sa Sugbu.

Ang mga paryente ug apo ni Don Vicente nga pangulohan ni Mikel Francisco Rama maoy mangulo sa floral offering.

Hinuon sukwahi sa selebrasyon sa charter day sa mga milabay'ng katuigan gi-postpone ang awarding niini nga ipahigayon unta karong hapon diha sa Cebu City Sports Center.

Si Mayor Tomas Osmeña nakahukom sa pag-postpone sa awarding ngadto na sa Marso 3 tungod sa dakung kalihukan sa boksing karong gabii diha sa Cebu City Sports Center nga giulohan og "Moment of Truth" diin ang main event niini mao ang away tali sa challenger nga Sugbuanong si Z "the dream" Gorres ug ang kampyon nga Meksikanong si Fernando Montiel.

Nasayran nga lakip sa makadawat og pasidungog sa charter day karong tuiga mao ang magpapatigayong si Norberto Quisumbing sa dakbayan sa Mandaue, Abanse Pinay party-list candidate Tessie Fernandez ug uban pa.