BOPK wa pay line-up

Bisan og wala pay mipatim-aw nga klarong kontra ang Bando Osmeña Pundok Kauswagan (BOPK) alang sa nagsingabot nga eleksyon karong Mayo, apan hangtod karon pabiling wala pa usab ma-kumpleto ang line-up sa kampo ni Mayor Tomas Osmeña alang sa pagka-konsehal.

Atol sa press conference kagahapon sa udto gipahibalo ni Osmeña nga pagkakaron wala pa sila makapili kun kinsay ihulip sa pipila ka mga konsehal sa partido nga anaa na sa ikatulo ug katapusang termino.

Ang mga konsehal sa BOPK nga anaa na sa katapusang termino naglangkob nila ni majority floor leader Jocelyn Pesquera ug Procopio Fernandez, samtang si Konsehal Gabriel Leyson sa amihanang distrito nakahukom na usab nga mokandidato pagka-mayor sa Talisay.

Hinuon matud ni Osmeña nga wala karon sila mag-problema kun kinsay ilang ihulip niining maong mga konsehal tungod kay gamay ra kaayo ang bakante kun itandi sa oposisyon nga hangtod karon wala pay klarong mga kandidato bisan sa pagka-mayor ug bise mayor.

Nasayran nga bugtong si kanhi Cebu City Sports Commissioner Jonathan Guardo mao pa lay nipadayag og interes nga mo-atbang ni Kongresista Antonio Cuenco sa hagabatang distrito dungan ang pagtukod sa grupo niini nga Tribu Guardo.

Gitakdang ipahibalo na sa oposisyon ang ilang mga kandidato pagka-mayor ug konsehal karong semana nga maoy moatbang sa BOPK.

Apan matud ni Osmeña nga unya pa sa deadline sa pagsang-at sa certificate of candidacy karong Marso 29 dungan sa ilang pagsang-at sa sertipiko de kandidatura ipahibalo niini ang ilang kinatibuk-ang line-up pagka- konsehal sa BOPK.

Si Osmeña niklaro hinuon nga wala siyay laraw nga babagan niadtong mga tawo nga buot moatbang kaniya sa umaabot nga piniliay.