Truck ban sa kadalanan sa siyudad higpit ipatuman

Gimanduan sa konseho sa siyudad sa Sugbu ang City Traffic Operation Management (CITOM) alang sa hugtanong pagpatuman sa truck ban sa mga kadalanan dinhi sa dakbayan sa Sugbu ilabi na niadtong mga dagkong trak de karga nga puno og mga kargamentong kemikal.

Si Konsehal Edgardo Labella, tsirman sa committee on laws sa konseho sa dakbayan mipasar ning maong resolusyon human niini mahibaw-i nga dunay daghang mga six-wheeler hauling trucks nga puno og mga kargamentong kemikal ug kanunay'ng moagi sa mga kadalanan dinhi sa dakbayan.

Gipasabot sa konsehal ang kapeligro sa maong mga kargamento ilabi na sa acetylene ug liquefied carbon dioxide tungod kay peligro kining mobuto ilabi na kun dunay gamay'ng kakulian ang masinati.

Gihimong basehanan sa konsehal ang labing bag-ong aksidente nga nahitabo didto sa Mindanao sa dihang dunay usa ka trak de karga nga kargado og liquified carbon dioxide ang mibuto nga mikalas og dili mominos 50 ka mga tawo.

Gipasabot sa konsehal ang kapeligro ning maong mga kemikal ilabina kun tugutang makayanoyano og biyahe sa mga kadalanan dinhi sa dakbayan sa bisan unsang orasa tungod kay daghang mga kadalanan dinhi sa dakbayan ang dunay daghang mga nagpuyo sa daplin ug peligro sa maong disgrasya.

Ubos sa Revised Traffic Code of Cebu City dunay hustong mga oras ug kadalanan nga gitumbok nga maoy bugtong agian sa mga dagkong trak nga magkarga ning maong mga kargamento aron malikayan ang maong gikabalak-an nga mga posibling disgrasya.

Si Citom executive director Arnel Tancinco gitakdang hatagan og kopya sa maong gipasar nga resolusyon alang sa hingpit nga pagpatuman sa truck ban ordinance dinhi sa dakbayan.