Babaye gidukdok og bato ang ulo patay

Patay na nga napalgan ang usa ka 47-anyos nga babaye kinsa nagkadugo ang ulo diha sa iyang umahan pasado alas 10 sa buntag sa milabay'ng adlaw diha sa Barangay Lamac, lungsod sa Pinamungahan.

Ang biktima giila sa kapolisan nga si Francisca Morales Quiapo, usa ka mag-uuma, residente sa maong lugar.

Base sa imbestigasyon sa mga polis nga si Quiapo migikan sa ilang balay pasado alas 6 sa buntag paingon sa iyang uma.

Apan pagka alas 10 sa susamang adlaw napalgan nalang ang biktima nga wala nay kinabuhi.

Ang kapolisan sa lungsod uban ni Dra. Shiela Factol, municipal health officer ang misusi diha sa lugar nga nahitaboan diin nasuta nga si Quiapo nakaangkon og mga samad sa ulo nga gituhoang maoy hinungdan sa kamatayon niini.

Ang mga polis adunay nakuhang usa ka dakung bato nga nagkadugo diha tapad sa patay'ng lawas ni Quiapo nga gituohang maoy gigamit sa wala mailhing kriminal og dukdok sa ulo sa biktima.

Ang kapolisan sa lugar wala pay nakuhang impormasyon kabahin sa motibo sa hitabo.

Si SPO2 Allan Tundag, polis sa Pinamungahan sa pakighinabi niini sa Banat News nagkanayon nga padayon pa ang ilang gihimong pakisusi kalabot sa maong insidente.