Uyoan giluba sa pag-umangkon

Kritikal ang kahimtang sa usa ka 50-anyos nga lalaki human kini unaya sa pagdunggab sa iyang pag-umangkon kinsa boluntaryong mitahan sa iyang kaugalingon sa mga opisyal sa barangay Catolohan, lungsod sa Dalaguete sa miaging gabii.

Ang biktima giila sa mga polis nga si Feliciano Detchoso ug ang suspetsado mao si Servando Amakna, 37, pulos lumolupyo sa maong lugar.

Si SPO1 Edwin Kilaton sa pakighinabi niini sa Banat News nagkanayon nga si Amakna mitahan sa iyang kaugalingon ngadto ni Marcelo Amaya ug Isidro Heredia mga opisyal sa barangay.

Si Amaya ug Heredia ang mitugyan ni Amakna diha sa kapolisan sa lungsod.

Matud ni Kilaton nga si Detchoso kinsa giingong hubog gikataho nga nagdala og pinote og misulong diha sa panimalay ni Amakna hinungdan nga giunhan na lang kini sa pagdunggab sa suspetsado.

Si Detchoso nakaangkon og mga samad dinunggaban sa lawas daling gidala diha sa Julio Cardinal Rosales District Hospital apan tungod sa kahimtang niini gibalhin diha sa Vicente Sotto Memorial Medical Center niining dakbayan.