Ang biktima giila sa kapolisan nga si Marcos Berongan Velvestre, 26 ug nagpuyo sa Sto. Niño sa samang lungsod samtang ang naangol mao ang magtiayong Eduardo, 51, ug Juanita Satar, 49, lakip ang duha nila ka anak nga si Herbert, 16 ug Georgie Ann, 9, residente sa Poblacion, Malabuyoc.
Segun sa report nga midangat sa Cebu Provincial Police Office nasayran nga ang namatay ug ang mga naangol misakay ug nang-hits sa Isuzu Elf (GJP 422) nga gimaneho ni Nicolas Cardeño Oliveros, 46, usa ka retiradong sundalo sa Philippine Army ug mismo maoy tag-iya sa maong sakyanan ug nagpuyo sa Malabuyoc.
Dugang nasayran siyam ang nang-hits sa maong sakyanan apan ang upat walay garas sa kalawasan human makaambak og dali.
Si Oliveros gikan sa Sto Niño ug paingon sa Sorsogon ug nagkarga 50 ka sakong balas nga tagtunga ang sulod ug nisakay ang mga biktima.
Pag-abot sa nahitaboan nga subidahon nga bahin ug dunay gitrabaho sa construction site sa ikaduhang taytayan napawong og kalit ang makina sa Isuzu Elf.
Miatras ang Isuzu Elf ug midailos lahos sa pangpang nga may giladmon nga 30 ngadto sa 50 metros.
Ang namatay nga diha atubangang bahin sa Isuzu Elf pagkahagbong sa pangpang maoy nag-una sa ubos ug nadat-ogan ang iyang dughan sa pangunahang ligid.
Ang pamilyang Satar nakaangkon lang og gagmay nga samad ug bun-og sa kalawasan human makaambak sa maong sakyanan.
Ang magtiayong Satar uban sa ilang duha ka anak nga naapil sa maong hitabo gidala sa M.J Cuenco Memorial Hospital sa Malabuyoc ug gikatahong luwas ang ilang kahimtang.
Samtang sa laing bahin naangol ang usa ka sakop sa 78 Infantry Batallion nga naa magbase sa Balamban, Cebu human ang iyang gimanehong motorsiklo midasmag sa usa ka kinse anyos nga lalaki sa miaging gabii didto sa National Hi-way Nangka sa maong lungsod.
Si PO1 Celso Maquidato sa Balamban miila sa sundalo nga nakadasmag ug naangol nga si Roy Mabolo, hingkod, minyo ug kasamtangan nagbase sa Balamban.
Samtang ang iyang gidasmagan mao si Kenneth Cortes, residente sa maong dapit.
Segun sa report ang biktimang si Cortes nagbarog sa daplin sa kalsada duol sa basketan sa nahisgutang dapit apan kalit lang gidasmagan ni Mabolo sa iyang motorsiklo nga gikan pa sa dakbayan sa Sugbu.
Matud ni PO1 Maquidato human maigo ang kinse anyos ni Mabolo silang duha ang nangabunal sa semento.
Nagduda ang kapolisan nga nakainom si Mabolo samtang nagmaneho sa motorsiklo kay misimang kini sa pikas dalan hinungdan nadasmagan ang batan-on.
Apan wala nila ma-liquor test kay gidala og dali si Mabolo sa tambalanan kay gikatahong naglisod ug dili makasulti.
Samtang si Cortes gidala usab sa tambalanan human makahiagom ug pangos ug bun-og sa kalawasan.