Tomas mibahad paggamit sa gahum vs Gwen

Mibahad si Mayor Tomas Osmeña ngadto kang Gobernador Gwendolyn Garcia nga mapugos siya paggamit sa iyang gahum batok sa gobernador sa higayon nga ma-upos na ang iyang pasensiya ug ipatuman gyud niini ang paghingilin sa kapin sa 5 mil ka mga pamilya nga nagpuyo karon sa luna sa probinsiya nga apektado sa nagubot nga land swap deal.

Matud ni Osmeña duna siyay daghang mga opsyon nga gamitong hinagiban batok sa gobernador apan iya lang kining gamiton sa higayon nga ipatuman niini ang pinugos nga paghingilin sa maong mga pamilya.

Wala motug-an ang mayor sa mga paagi nga iyang nahunahunaan aron dili makabantay ang Kapitolyo apan iyang giklaro nga daghang klase sa mga pamaagi ang iyang gikonsiderar nga gamiton unya batok sa Kapitolyo.

Giklaro hinuon ni Osmeña nga wala siya masayod sa giandam nga panagtigum unta tali nila ni Garcia didto sa Cebu City Sports Club niadtong milabay'ng adlaw dungan sa panagtagbo nila ni City Administrator Bimbo Fernandez ug Capitol Consultant Pablo John Garcia ug mga kaubanan nga nagtuki sa problema sa nagubot nga land swapping.

Wala mopasalig si Osmeña nga ma-withdraw ang gipasar nga resolusyon sa konseho nga nagpatuman sa moratorium sa konstruksyon sa bisan unsang edipisyo sa luna sa probinsya diha sa gi-develop nga Ciudad project sa Banilad.

Apan gipasalig sa mayor nga himuon niya kutob sa iyang mahimo ug gamiton ang iyang impluwensiya sa konseho aron ma-withdraw ang maong resolusyon sa higayon nga aprobahan sa Kapitolyo ang pagpadayon sa orihinal nga bersyon sa land swap deal.

Nasayran nga gumikan sa maong gipasar nga resolusyon sa konseho mibawos usab ang gobernador ug gipasirad-an niini ang pipila ka access road diha sa Larsian sa Fuente Osmeña ug IT park sa Banilad sa mga luna sa Kapitolyo.

Gani plano usab nga bawion sa Kapitolyo ang luna nga gitukoran sa Cebu City Police Office (CCPO), Bagong Buhay Rehabilitation Center (BBRC) sa Kalunasan ug ang Drug Rehabilitation and After Care Center (DRACC).