Kontrobersiyal nga polis nga suspendido nakasikop og tulisan

Usa sa tulo ka tulisan nga nagsakay og motorsiklo nadakpan human manulis sa manag-uyab sa miaging kaadlawon duol sa Harrison Park dalan Osmeña Boulevard ug Urgello, Sambag II ning dakbayan.

Ang nadakpan giila sa kapolisan mao si Maximilian Tautho, 19, ulitawo, sakop sa Akrho ug nagpuyo sa dalan Ranudo, Cogon Ramos ning dakbayan sa Sugbo.

Ang nakadakop sa suspetsado mao ang kontrobersyal nga polis nga si PO1 Junicar Estiñoso kasamtangan nadestino sa Regional Security Service Group sa Regional Police Office 7.

Samtang ang duha ka kauban ni Tautho wala mailhi human nakaikyas palayo sa lugar dihang mipasirit dagan sa motorsiklo.

Ang biktima mao si Arnie Yanos, 25, dalaga lumad nga taga Sibonga, Cebu ug kasamtangan nagpuyo diha sa Lower Urgello, Sambag II ning dakbayan kinsa daling nakapangayog tabang sa mga residente sa nahisgutang dapit ug naatol nga naagi si Estiñoso ug gisikop.

Matud sa report ang biktima samtang naglakaw sa maong dapit uban sa hinigugma naagian sa grupo ni Tautho ug pag-abot sa unahan mihunong ang motorsiklo nga gimaneho sa kauban ni Tautho ug nagtuo ang biktima nga dunay deperensya ang ilang motorsiklo apan si Tautho ug usa ka kauban nanganaog ug gisugat ang biktima uban sa iyang uyab.

Dihadiha nagdungan og bunot ang duha sa wala matinong kalibre sa armas ug kutsilyo dayong deklarar og tulis.

Gikuha ang knapsack nga gidala sa uyab ni Yanos nga dunay sulod nga duha ka Samsung cellphone nga nagkantidad og P1,500 ug P5,500 ug cash nga P2,000.

Apan walay suwerte kay naabtan ni PO1 Estiñoso ug nabawi ang bag sa posesyon ni Tautho.

Ang suspek gitanggong na karon sa Fuente Police Station ug nagpaabot sa tukmang kaso nga ipasaka batok kaniya ug sa duha niini ka kauban.