Sir Dodong di modagan

Giklaro ni kanhi Kongresista Jose "Dodong" Gullas nga dili siya magpapili pagka-mayor atbang kang Mayor Tomas Osmeña dinhi sa dakbayan sa Sugbu sa Mayo nga eleksiyon.

Kagahapon sa buntag, usa ka press conference ang gipatawag ni Dodong Gullas diha sa iyang buhatan sa University of the Visayas (UV) aron matin-aw ang mga tabi-tabi nga magpapili siya pagka-mayor sa umaabot eleksyon.

Gipasabot ni Gullas nga usa ka seryosong pagtimbangtimbang ug konsultasyon ang iyang gihimo una niya nakab-ot ang maong hukom.

Matud niya mayoriya sa iyang upat ka mga anak apil ang iyang asawa supak nga mag-apil-apil siya sa politika karong eleksiyon.

Labaw sa tanan girespitohan niya ang pahimangno sa ilang mga ginikanan nga dili silang duha ni Kongresista Eduardo "Eddiegul" Gullas magdungan sa pagpamolitika tungod kay mapasagdan na lang ang pagdumala sa mao nilang tunghaan susama sa nahitabo kaniadto dihang napili siyang kongresista sa unang distrito sa lalawigan sa Sugbu ug si Eddiegul nahimong mayor sa siyudad sa Talisay.

Giangkon ni Dodong Gullas nga naglainlaing sektor dinhi sa dakbayan gikan sa mga vendors ngadto na sa mga negosyante ug urban poor ang naghangyo kaniya nga mokandidato pagka-mayor.

Hinuon gipasalig ni Dodong Gullas nga bisan pa man og anaa siya sa pribadong sektor pabilin gihapon siyang makaserbisyo sa publiko susama sa iyang gihimo karon nga pagdumala og tunghaan ingon man sa lokal nga pamantalaan nga gipanag-iya sa ilang pamilya ang The Freeman ug Banat News.

Hinuon mipasalig si Dodong Gullas nga mopaluyo sa mokandidato pagka-mayor atbang kang Osmeña basta motukma sa iyang mga programa ang plataporma de gobyerno niini.

Mitumaw ang mga tabitabi nga molansar pagka-mayor si Dodong Gullas human mibalhin kini og parehistro dinhi sa dakbayan gikan sa iyang residensiya didto sa Manglanilla, Cebu.