Imperial irekomenda nga most wanted

Girekomendar sa Cebu City Police Office (CCPO) nga ilhong usa sa most wanted person dinhi sa Sugbu ang banggiitan ug iladong tulisan nga si Doroteo Imperial kinsa maoy gipasanginlang responsable sa sunod-sunod nga pagpanulis dinhi sa dakbayan sa Sugbu diin ang pinakauwahing insidente nahitabo niadtong Lunes sa buntag kinsa usa ka kolektor sa Equitable PCI Bank ang gitulis.

Si Acting City Director sa CCPO Sr. Superintendent Patrocinio Comendador mibutyag sa mga tigbalita kagahapon nga ila pang iduso ang rekomendasyon batok kang Imperial ngadto sa Police Regional Office 7 ug ang PRO 7 mao nay moduso ngadto sa Department of Interior and Local Government (DILG).

Matud ni Comendador nga nakigtagbo siya ni Cebu City Councilor Jun Pe aron hisgutan ang kabahin sa mao nilang plano ug wala pa sila masayud kung pila ang kantidad nga ipatong sa ulo ni Imperial tungod kay mag-agad man sila sa desisyon sa LGU.

Si Imperial maoy gitumbok nga mitulis sa Yusay Credit and Finance Corporation sa dalan Gorordo sa miaging buwan, Anchor Savings Bank sa milabay'ng duha ka semana ug ang pinakauwahi mao ang kolektor sa PCI bank nga si Sherwin Cabarubias niadtong Lunes diha sa dalan Jakosalem corner Juan Luna Avenue ning dakbayan.

Si Cabarubias gikan nagkuha og tseke sa Du Ek Sam apan sa iyang paggawas sakay sa motorsiklo kalit siyang giduol sa grupo ni Imperial dayon midiklara kini og tulis.

Si Cabarubias gikatahong nagmagahi sa paghatag sa iyang motorsiklo ngadto sa kauban ni Imperial hinungdan nga gipusil sa suspetsadp apan wala siya maigo sa maong pagpamusil.

Nakuha sa mga tulisan gikan ni Cabarubias ang P2 mil nga salapi ug ubay-ubay nga tseke.