Supt. Loot nagpabilin og handumanan

Gipahigayon kagahapon sa Cebu Provincial Police Office ang Computerization Program ug ang ground breaking ceremony alang sa permanenteng headquarters sa Cebu Provincial Police Office nga gipasiugdahan ni kanhi CPPO director Sr. Police Superintendent Vicente Loot.

Si Loot nagkanayon sa mga tigbalita nga iyang nakab-ot ang maong kalampusan ug mibiya siya nga dunay handumanan human sa iyang pagdumala sa CPPO.

"This was the product in combination with cooperation of love and commitment these projects formed part of the commitment by the administration of Governor Gwendolyn Garcia to be the PNP's partner in its peace and order efforts in the province" ni Loot pa.

Si Gobernador Garcia sa iyang mensahe nagkanayon nga iya nang palapdan ang kapabilidad sa pagtubag sa kapolisan sa mga alarma pinaagi sa Computerization Program nga makahatag og paspas nga impormasyon ngadto sa tanang police station sa probinsya ug ang mga tawo nga nagpakabana sa kriminalidad.

Matud ni Garcia pun-an pa niya ang suporta nga iyang gihatag sa kapolisan sa probinsiya.

"So you can say we not only increase your mobility and accessibility, we also helped you find and build a new and permanent home"

Dugang pa sa gobernador nga nahatagan na niya og mga sakyanan ang tanang police station sa kalungsuran nga sakop sa probinsya.

Human sa launching kagahapon gisunod gilayon ang ground breaking alang sa pagatukoron nga bag-ong provincial command sa CPPO Headquarters diha sa Sudlon Lahug.

Si Sr. Superintendent Carmelo Valmoria, hepe sa CPPO nagpasalamat nga sa katapusan duna na silay permanenteng lugar human sa pito ka higayon nga sila gibalhin-balhin og buhatan.

Samtang si PNP Chief Oscar Calderon mitug-an nga ang CPPO maoy una nga Provincial Headquarter sa Pilipinas nga giabaga sa kagamhanan sa probinsiya nga gipangulohan ni Governor Garcia.

Iyang gitawag og class A headquarter nga permanente na ang ilang buhatan.

Ang kagamhanan sa probinsiya migahin og P11.7 milyon sa duha ka andana nga building ug gitugbangan kini sa PNP og P10 milyones alang sa logistics nga gamiton sa kapolisan.

Gawas sa police headquarters ang PNP building sa CPPO gidisenyo sa desenting panimalay sa mga polis gumikan niini makapanghambog na unya sila nga duna silay kaugalingon pinuy-anan, matud ni Calderon.

Ug tungod sa bag-ong teknolohiya nga ilang gipatuman karon sa kapolisan pahugtan ni Calderon ang pagpanggukod sa mga kriminal ug badlungon sa katilingban.

Si Calderon midungag nga kinahanglan sinsiro na ang kapolisan sa serbisyo para mamahimong epektibo ang ilang pagtuman sa kahapsay ug kalinaw.