Vic Loot nakit-an sa pulong-pulong

Bana ni Daanbantayan Mayor Ma. Luisa Loot nga si kanhi police provincial director, Sr. Supt. Vicente Loot kanunay nga makit-an nga nagkuyogkuyog sa mga pulong-pulong sa iyang asawa matag barangay sa maong lungsod.

Gikonpirmar ni retiradong polis, Supt. Hiram Benatiro nga si Supt. Loot atua kanunay sa Daanbantayan, sukwahi sa report nga atua kini sa Camp Crame diin didto kini nadestino human sa 12th Asean Summit. Si Benatiro usa sa magpapili pagka-konsehal sa Daanbantayan ubos sa tiket ni Engr. Augusto "Dodong Itok" Corro nga giingong igsuon sa asawa ni Lapu-Lapu City Mayor Arturo Radaza.

Matud pa ni Benatiro nga isip usa ka dakong opisyal sa Philippine National Police ug agi'g delekadesa nga ang iyang sakop sa pamilya modagan sa dagkong posisyon sa maong lungsod dili kini angayan mag-apil-apil sa mga pulong-pulong nga pagahimuon sa mga kandidato ni Mayor Loot.

Gikuwestiyon usab ni Benatiro kun nganong nia siya sa Sugbu nga human sa iyang pagkarelibo isip direktor sa Cebu Police Provincial Office didto naman gidestino sa kaulohan.

Si Benatiro nga nakigkita kang Sr. Supt. Loot mihangyo nga dili mag-apil-apil sa politika sa iyang asawa ug anak, apan wala kini mopatuo.

Gumikan niini, nagduda ang mga kauban ni Benatiro nga estratehiya ni Mayor Loot ang pagpakita sa presensiya sa iyang bana sa mga barangay sa ilang lungsod aron mahadlok ang katawhan sa Daanbantayan ug mapugos pagdapig sa mga Loot.

Si Mayor Loot maoy modagan pagka-bise mayor pares sa iyang anak sa unang bana nga Hapon, nga si Sun Shimura nga buot mag-mayor.

Mibahad si Benatiro nga iyang ipaabot sa kadagkuan sa PNP ang gihimo ni Sr. Supt. Loot gumikan kay kalapasan sa lagda sa PNP ang pag-apil-apil sa politika o pagka-partisan atol sa piniliay.

Si Sr. Supt. Loot gi-text ning tigbalita kabahin sa pasangil ug mikompirmar kini nga nia dinhi sa Sugbu karon pinaagi sa pagtubag og "yup" apan wala kini mokomentaryo sa dihang gipahibalo sa akusasyon ni Benatiro ngadto kaniya.