Kampanya vs prosti hingusgan sa CAIB

Hingusgan sa Cebu City Anti-Indecency Board (CAIB) ang kampanya pagsumpo sa naghitak nga problema sa prostitusyon dinhi sa dakbayan sa Sugbu karong tuiga.

Mao kini sentro sa kamanduan ni Mayor Tomas Osmeña bugti sa iyang pag-uyon nga ma-renew ang appointment ni Caib chairman Dr. Rene Josef Bullecer ug mga sakop sa board human sa ilang paghinabi dili pa lang dugay.

Atol sa press conference kagahapong adlawa giklaro sa mayor nga nakahukom siya nga i-renew ang appointment sa CAIB karung tuiga bugti sa pagpatuman sa iyang mga prayoridad sama sa pagsulbad sa prostitusyon, pagpanalipod sa mga minor de edad batok sa mga pagpangabuso ingon man ang pagsumpo sa pagsabasaba ilabi na sa mga balay kahilayan ug mga KTV bar panahon sa kagabhion nga makatugaw sa pagkatulog.

Samtang gibaoran ni Osmeña ang CAIB nga dili mag-apil-apil o manghilabot sa mga gimbuhaton sa City Health Department sama sa gihimong pagpanakop niini niadtong mga GRO nga walay health card gikan sa maong buhatan.