2 babaye, ex-driver sa patrol nagsuyop gipanakop

Tulo ka mga tinun-an sa kolehiyo sa usa ka unibersidad dinhi sa dakbayan, duha kanila mga babaye ug usa ka kanhi drayber sa patrol car sa kapolisan ang gidakop human pasanginling naaktuhang nanuyop sulod sa usa ka balay diha sa sudlonong bahin sa dalan Balagtas sa Pahina Central niadtong milabay'ng adlaw.

Ang mga nadakpan giilang sila si Junalhiza Estoque, 21, nagpuyo sa usa ka pension house sa dalan Pelaez; Mary Ann Lacerna, 18, residente sa gihitaboan; Ezra Rey Luib, 22, taga San Roque, Mambaling ug Aldrich Saavedra, 46, tag-iya sa balay, residente usab sa gihitaboan.

Ang nakadakop sa upat mao ang grupo nila ni SPO3 Marciano Sobiono nga gilangkuban nila ni SPO2 Rogelio Cabunilas; SPO1 Romeo Abellana; SPO1 Leo Hortelano ug PO2 Christopher Sanchez sa Carbon police station.

Matud pang Sobiono sa pakighinabi sa Banat News usa ka residente sa maong dapit maoy mitawag sa ilang buhatan ug mitug-an kabahin sa mga tinun-ang nanulod sa panimalay'ng Saavedra nga ilang gituuhang manuyop.

Mismong ang maong impormante ang mikuyog sa kapolisan pagtultol sa maong balay diin naabtan nila ni Sobiono nga wala matarong ang pultahan pagkasirado ug makita ang mga tawo ug ang ilang gibuhat diha sa sulod.

Diha-diha gihimo ang pag-aresto diin gikatahong matag usa kanila nakuhaan og mga ginamit nga mga foils, lighter, improvised tooter ug mga linikit nga tissue paper nga gamiton sa pagsuyop.

"Nanuyop ni sila sa balay ni Saavedra, naa may impormante nato nga mao gyuy ni-guide namo didto kay sudlonon man ni kaayo ang ila," asoy pang Sobiono.

Sumala pang Sobiono si Saavedra kanhi driver sa city hall ug gidestino kini isip sibilyan nga drayber sa mga police station sa dakbayan apan niadtong 2003 gikatahong wala na kini motrabaho.

Kasong paghupot og mga drug paraphernalia ang gipasaka sa kapolisan kagahapon batok sa upat.