Kwarta sa eleksiyon magbaha sa D'bantayan

Gipaabot nga magbaha ang kwarta sa eleksiyon sa lungsod sa Daanbantayan karong Mayo 14.

Kini human giingong motabang si Lapu-Lapu City Mayor Arturo Radaza balor og P25-milyones ngadto kang Agustin "Itok" Corro kinsa mopapili sa pagka-mayor atbang sa anak ni Mayor Maria Luisa Loot nga si Sun Shimura.

Si Shimura giingong gastuhan usab sa amahan niining Hapon og minilyon nga salapi gawas sa kwarta ni Loot.

Apan sa interbyu sa Bantay Radyo kang Loot, iyang gipasabot nga dili pamalit og botos ang ilang tumong sa paggamit sa kwarta kon dili pahinungod kini ngadto sa ilang mga tawo nga kanunay'ng nagpaluyo kanila.

Mipahimangno hinoon si Loot ngadto sa ilang kaatbang nga dakpon gyud kon masakpan nga mamalit kini og botos panahon sa eleksiyon sanglit gidili kini sa balaud.

Giawhag usab ni Loot ang taga dakbayan sa Lapu-Lapu sa pagsusi sa ilang panudlanan sanglit kon tinuod ang iyang nadawat nga taho, kwarta sa mga magbubuhis ang ipagasto ni Radaza kang Corro.

Wala hinuon nabalaka si Loot sa minilyon nga giingong gastuhon ni Corro sa eleksiyon sanglit dili na maliso pa ang baruganan sa iyang mga tawo.

Si Loot modagan sa pagkabise-mayor samtang ang iyang anak ang mayor.

Kumpleto na ang ilang line-up ug nagpaabot nalang sa pagsang-at sa ilang certificate of candidacy.

Katapusang adlaw sa pagsang-at niini unya pa sa Marso 29 samtang sundan dayun sa pagpangampanya hangtud na sa Mayo 12.