Tiil sa nakuryentihan mibuto

Mibuto ang tiil sa usa ka construction worker sa dihang nakuryentihan samtang nagtrabaho sa usa ka apartment sa dalan Ompad, Poblacion, Lapu-Lapu kagahapon sa buntag.

Ang biktima mao si Dominador Colipano, 35, ulitawo, lumad sa Cambangcaya, Catmon, Cebu ug usa ka construction worker.

Base sa imbestigasyon ni PO3 Frederick Eslit ug ni PO3 Manolito Abellanosa nasayran nga si Colipano anaa sa ikatulong andana sa usa ka apartment nga gitukod sa naasoy'ng dapit.

Ang maong apartment gikatahong gipanag-iya ni Delfin Radaza, igsoon ni Mayor Arturo Radaza sa Lapu-Lapu.

Si Colipano wala makabantay nga ang iyang gigunitang kabilya nasangit sa linya sa kuryente sa Mactan Electric Co. hinungdan sa nakuryentihan kini sa tibuok niyang lawas ug nagbitay kini sa maong kable sa pipila ka gutlo dayong kahulog paingon sa ubos.

Matud pa ni PO3 Abellanosa nga si Colipano nahiagum sa pagbuto sa iyang walang tiil.

Gani, lakip ang bukog sa tiil nasunog ug samtang laing samad nakita sa iyang lapalapa nga gituhoang maoy gigawasan sa kuryente. Gikahadlokan nga maputol ang wala niyang tiil.

Ang biktima gidali pagdala sa Mactan Doctor's Hospital ug anaa kini sa malisud nga kahimtang diin matud pa sa doktor si Colipano nahiagum sa usa ka electrical burn sa iyang paa ug tiil.

Samtang hangtud ning pagsuwat sa balita wala pa masayri kun sagubangon ba sa tag-iya sa apartment ang galastuhan sa tambalanan pagpatambal ni Colipano.