Gipatay atubangan sa iyang balay

Patay ang usa ka mag-uuma diha sa atubangan sa iyang panimalay human gipusil sa wala mailhing tawo pasado alas 7:30 sa gabii niadtong Sabado didto sa Sitio Lamac, Corte Carmen.

Patay nang nadangat sa Danao District Hospital ang biktimang giila sa kapolisan nga si Romulo Bayo, 41, ulitawo ug residente sa samang dapit.

Nasayran ang biktima kinsa nagsaulog nianang adlawa sa kasumaran sa adlaw'ng natawhan.

Siya nakaangkon og samad pinusilan diha sa iyang wala nga hawak ug nilapos sa wala nga dughan nga maoy nakaingon sa kamatayon niini.

Apan hangtod karon ang kapolisan wala pa nailhan nga mamumuno.

Si P/Insp. Carlos Reyes nga nahinabi sa Banat News nagkanayon nga base sa ilang gihimong pakisusi nasayran ang biktima dunay silingan nga gikalalis sa miaging semana.

Kini tungod kay ang kanding sa biktima giingon gipaak sa iro sa iyang silingan nga maoy sinugdanan sa mainiton nilang panaglalis.

Gawas pa niini laing anggulo ang gitutukan ni Insp. Reyes sa ilang nagpadayon nga imbestigasyon mao nga ang biktima may gikalalis nga driver sa backhoe operator dihang ang yuta sa biktima naakpektuhan sa gitrabaho sa maong operator.

Nagtuo si Reyes nga giatngan ang biktima nga mogawas sa iyang panimalay tungod kay igo lang kini nakakanaog sa hagdanan dihang gipusil.

Base sa iyang samad pinusilan si Reyes nagkanayon nga naghupo ang gikatahapan nga nipusil sa biktima kay ang entry sa bala diha sa hawak ug nisaka ang bala sa walang bahin sa dughan.

Niklaro si Reyes nga sa pagka karun wala pa silay lead kung kinsa ang mamumuno apan nagpadayon pa ang ilang imbestigasyon apan ang tanang mga anggulo maoy usa sa ilang gitutukan.