Ang naligsan ug namatay giila sa kapolisan nga mao si Virgilio Mantos, 43, minyo usa ka welder ug residente sa Cabangbang sa maong lungsod.
Samtang ang nakaligis sa biktima mao si SPO4 Conrado Pabillon, officer-in-charge sa Madredijos Police Station ug nagpuyo sa Bantayan.
Apan ang hepe sa Cebu Provincial Police Office, Sr. Supt Carmelo Valmoria mimando gilayon ngadto sa Provincial Investigation Detection Management Branch sa CPPO nga ipailawom sa imbestigasyon si SPO4 Pabillon.
Base sa imbestigasyon sa kapolisan si SPO4 Pabillon nagmaneho sa iyang Wrangler type nga jeep gikan sa Madredijos ug padulong na mopauli sa Bantayan subay sa provincial road apan iyang gikasugat ang biktima nga nagmaneho usab sa Honda nga motorsiklo.
Segun sa report si SPO4 Pabillon mialegar nga ang biktima wala magpasiga sa suga sa motorsiklo hinungdan nga wala niya mabantayi dihang iyang gikasugat ug naigo dayong nalatayan sa ligid ang biktima human malagpot sa kalsada.
Nasuta usab sa kapolisan ang sakyanan ni SPO4 Pabillon ni- expired ang rehistro samtang ang biktima walay klarong dokumento ang motorsiklo ug ingon man ang duha walay driver's license nga nakuha ang kapolisan.
Daling gidala ang biktima sa Bantayan District Hospital apan nakabsan kini sa iyang kinabuhi.
Samtang si SPO4 Pabillon gibalhog sa detention cell sa Bantayan human sa aksidente.
Si SPO4 Melquiadez Seares nga nahinabi sa Banat News nagkanayon nga base sa mga nakasaksi sa dapit nga nahitaboan ang duha parehong nakainom og ilimnong makahubog samtang nagmaneho sa ilang tagsa-tagsa ka sakyanan.
Apan pagka alas 3 sa hapon sunod adlaw si Pabillon gibuhian ug gipagawas sa detention cell human ang mga kabanay sa namatay wala moanha sa police station sa Bantayan.
"Posibling naay nakab-ot nga panagsabot-sabot sa kabanay ug ni Pabillon" dugang asoy ni SPO4 Seares.
Samtang si Valmoria sa iyang bahin niingon nga SOP na gyud na sa kapolisan kun dunay malambigit nga polis ipailawom gyud sa imbestigasyon.
Giklaro hinuon ni Valmoria nga magpabilin sa iyang puwesto si SPO4 Pabillon isip hepe sa Madredijos kay sa pagka-karon walay laing ikahulip kaniya samtang iyang gipaabot ang resulta sa imbestigasyon sa PIDMB.