Akbayan, Bayan Muna pasidunggan atol sa charter day

Hatagan og pasidungog ni Mayor Tomas Osmeña ang mga militanting pundok atol sa charter day sa dakbayan karung petsa 24 niining bulana.

Gisumiter na sa mayor ngadto sa konseho ang mga lista sa mga indibidwal nga makadawat og pasidungog atol sa charter day ug apil na niini ang militanting pundok nga Bayan Muna ug Akbayan.

Daling gipasabot ni Osmeña ang iyang nakab-ot nga hukom paghilakip sa Akbayan ug Bayan Muna nga makadawat og plaque of appreciation tungod sa gipakitang kooperasyon niini hinungdan nga nagmalampuson ang pag-host sa Sugbo sa 12th Asean summit niadtong Enero 12 hangtod sa 15.

Matud sa mayor tungod sa iyang pagpatunga ug maoy nakig-negosasyon sa mga nag-rally nga militanting pundok napugngan ug wala mopahigayon og pagpangubot sa summit ang maong grupo hinungdan nga agi og pasalamat iya kining hatagan og pasidungog sa kooperasyon niining gihimo.

Samtang ang Akbayan makadawat usab sa susamang pasidungog tungod kay daghan kini og mga proyekto nga nahatag sa kabarangayan gikan sa pork barrel sa ilang party-list.

Gani mas gihangop sa mayor ang Akbayan nga nakahatag og P5 milyones nga balor sa mga proyekto sa kabarangayan dinhi sa dakbayan kun itandi sa daghang mga senador nga pipila lang niini ang nakahatag og mga proyekto dinhi sa dakbayan.

Apil sa makadawat og pasidungog atol sa charter day mao ang mga kapitan sa Talamban, Pulang-Bato, San Jose, Pit-os, Bacayan nga nagkahiusa pagsumpo sa suliran sa gidiling drugas ug pagpatunhay sa kahusay ug kalinaw sa maong lugar.

Samtang sa mga indibidwal nga makadawat og pasidungog nag-una niini ang magpapatigayon sa siyudad sa Mandaue nga si Norberto Quisumbing Jr. nga ideklarar unya nga "adopted son" sa dakbayan ug ang labaw sa Lihok Pilipina ug Abanse Pinay party-list candidate Tessie Fernandez.