Mitulis, mipusil sa Koreana gitumbok sa magtiayon

Nadugangan ang kaso sa duha ka suspek sa pagpanulis ug pagpusil sa usa ka Koreana dihang gitumbok sila sa duha ka mga contractor mipasangil nga sila maoy milabni sa bag niini niadtong Pebrero 12 diha sa Bakilid, Mandaue.

Ang magtiayong Alfred, 54, ug Lorna Guido,51, mga residente sa Labogon, Mandaue mianha sa buhatan sa Theft and Robbery Section ug mipasangil nila ni Ramil Pelicano ug Adrian Lim nga maoy milabni sa bag diha sa may atubangang bahin sa usa ka kan-anan dalan A.S. Fortuna sa Bakilid, Mandaue.

Atubangan sa daghang mga sakop sa media gitudlo sa magtiayon sila si Lim ug Pelicano nga maoy luwan sa usa ka motor dihang gilabni ang bag nga may sulod nga P88 mil ug duha ka cellphone.

Matud pang Lorna nga mao pay pagkanaog niya sa ilang sakyanan nga Fortuner niadtong tungura ug miabli siya sa pultahan sa backseat diin iyang gikuha ang iyang bag, apan sa pagsira niya og balik kalit nga misakdap ang motorsiklo ug gikuha ang iyang bag dayong sutoy palayo sa dapit.

Si Alfred, kinsa usa ka arkitekto, mitumbok sa duha bisan sila gipatalikod ug gipaatubang.

Ang magtiayon padulong niadtong tungura sa usa ka hardware aron mamalit og mga materyales sa gihimong balay maong nagdala sila og niadto ka dakong cash sumala pang Lorna.

Sila si Lim ug Pelicano positibong giila sa mga testigo nga maoy mitulis ug mipusil sa turistang Koreana nga si Young Seuk Jeon,31, niadtong Pebrero 10 diha sa usa ka gasolinahan sa dalan Gen.M.C. Cuenco Avenue sa Banilad.

Ang duha nadakpan sa managlahing operasyon sa TRS, CIIB, VCS ug Homicide Section niadtong Miyerkules sa gabii ug Huwebes sa kaadlawon. Si Lim nadakpan sa Polpogan, Consolacion ug si Pelicano sa Ponce Compound sa Carreta ning dakbayan.