15-anyos gilugos og kaduha sa silingan

Usa ka minor de edad gilugos sa iyang silingan nga mag-uuma samtang nahinanok sa pagkatulog sa panimalay sa iyang apohang babaye kaduha ka higayon sa miaging adlaw.

Kini nahitabo sa Banlot, Sibonga pasado alas 6 sayo sa buntag apan giusban pa sa suspek og among-among duha ka oras ang nakalabay diha gihapon sa balay sa apohan.

Apan ang gikatahapan nasikop sa kapolisan human sa hitabo dihang ang 15-anyos nga biktima misumbong sa buhatan sa Women's Desk sa Sibonga Police Station.

Si PO3 Ethel Teves ug PO2 Darlin Banugon ang misikop ni Christopher Obod, 34, minyo didto sa iyang pinuy-anan sa Banlot sa nahisgutang lungsod.

Segun sa pasangil ni Merlin, 15, nga samtang natulog siya sa kuwarto sa panimalay sa iyang apohang babaye iyang namatikdan dunay mibira sa habol.

Matud sa biktima gimanduan siya sa suspek nga dili mosiyagit aron dili patyon.

Dihadiha gihuboan dayon sa underwear ang biktima hangtod nga gipahimuslan ang iyang pagkababaye.

Apan nianang pagka-alas 9 sa buntag sa susamang adlaw si Merlin giusban na usab sa suspek sa paglugos diha gihapon sa balay samtang nag-inusara lang kini.

Nakabantay ang biktima nga miagi ang iyang uyoan hinungdan nga nakahigayon kini pagdagan ug deretsong mitaho sa kapolisan.

Sa gihimong follow-up operation ni Teves ug Banugon nasikop ang gikatahapan.

Si SPO1 Ceasar Gutang nga nahinabi sa Banat News niingon nga ang biktima kanunay mahabilin sa panimalay sa iyang apohan tungod kay ang apohan manindahay og utanon sa merkado sa Sibonga.

"Namatikdan na seguro sa suspek nga siya pirme sa balay kay iyang lola toa pirme sa merkado maninda'g utanon," dugang asoy ni SPO1 Gutang.

Ang biktima nahiling na sa mga doktor sa pink room sa Vicente Sotto Memorial Medical Center samtang ang kapolisan nagpaabot sa resulta aron maoy ilang basehanan sa pagpasaka'g kasong pagpanglugos batok sa gikatahapan samtang gitanggong sa detention cell.

Samtang laing gibalhog sa bilanggoan sa Toledo City Police Station ang usa ka batan-on lalaki nga buot untang molugos sa usa ka ginang sa panimalay didto sa Sitio Pandong Bato, Media Onse sa maong dakbayan.

Ang insidente nahitabo niadtong Lunes sa gabii pasado alas 7 sa gabii.

Apan boluntaryo nga misurender sa kapolisan pagka sunod adlaw ang batan-on nga si Jomar Lacaolacao, 20, ulitawo, lumad nga taga Santander, Isabela Negros Occidental ug kasamtangan nagpuyo sa nahisgutang dapit.

Sa iyang pagsurender sa buhatan sa kapolisan iyang gidala ang, 22 paltik rebolber nga dunay unom ka buhing bala.

Siya gipasanginlan sa usa ka ginang nga nagpangedaron og 33 anyos, minyo ug nagpuyo ra usab sa naasoy'ng dapit.

Segun sa report ang suspek misaka sa balay sa ginang ug misuway og lugos.



Wala midayon ang dautang tinguha sa suspek kay nagdumili ang biktima human misukol.

Daling mipahibalo sa kapolisan ang biktima apan ang suspek nga nakahibalo nga siya gisumbong misurender dayon.

Ang suspek nga si Lacaolacao gipasakaan na og kasong attempted rape ug kaso sa Comelec gun ban gumikan sa pagtiner niini og armas.