Hustong pagpili'g kandidato atol sa eleksyon 'giawhag, samtang wala sa lugar nga posters laksion

uban sa report nila ni Wen Celen ug Brenda Batuto

Mga abogado kinsa speaker sa gipahigayong Democracy and Law at the Service of the Human Person seminar misaway sa publiko tungod sa ilang kapakyas pagpili og tukmang mga kandidato nga mahimong lider sa nasud.

Si Justice Delilah Vidallon Magtolis nagkanayon nga ang usa sa dakong problema sa nasud mao ang pagkawalay prinsipyo sa mga botante kinsa kasagaran wala maghatag og kamahinungdanon sa ilang pilion nga mga politiko nga makahatag og kaayohan sa nasud.

Ang kasagaran sa publiko mopili sa mga sikat nga mga actor, actress ug mga atleta kinsa mokandidato apan dili tungod sa ilang katakos sa pagpangulo sa katawhan ngadto sa kalamboan.

Si Jose Cuisia, presidente sa Values for Development Foundation nagkanayon nga walay standard nga gibasehan ang nasud para sa mga modagan isip lider kinsa uban sa mga kandidato wala gani kini mga degree.

Samtang dunay gitukod ang Comelec nga usa ka task force nga langkuban sa PNP, LGU ug ilang buhatan aron tahasan sa pagpanglaksi sa mga campaign materials nga gipapilit sa mga lugar nga dili sakop sa gi-designate nga common poster area.

Matud pa ni Election officer Michael Sarno sa Cebu City, North district nga ang gi-designate nga mga dapit mao ang sports complex sa matag barangay, basketball courts ug public market.

Si Sr.Supt. Patrociñio Comendador, direktor sa Cebu City Police Office sa pakighinabi sa Banat News nagkanayon nga ilang paabuton ang direktiba sa rehiyonal nilang buhatan kabahin sa maong kamandoan sa Comelec.

Miangkon si Comendador nga wala pa sila makadawat og eksaktong guidelines nga nag-designate sa mga campaign poster areas sa Sugbu aron maoy ilang basehan sa paghimo og aksyon.