Junkshop namalit og junk sa siyudad pasiradoan

Gimando ni Mayor Tomas Osmeña nga pasirad-an ang operasyon sa usa ka junkshop nga namalit sa mga gubaong butang sa siyudad nga ilegal nga gipamaligya ngadto sa usa ka kawani sa Squatters Prevention Encroachment and Elimination Division (SPEED).

Gimandu usab sa mayor nga ilhon kadtong mga kawani sa siyudad nga maoy responsable sa maong binuang aron kapahamtangan kini og tukmang silot.

Usa ka kawani sa SPEED nga si Samuel Lucernas Sr. misumbong ngadto kang City Information Officer Nagiel Bañacia kabahin sa ilegal nga pagpamaligya sa mga karaan nang medical equipment nga gidonar ngadto sa siyudad nga kasamtangang gipahiluna diha sa maong buhatan.

Gitumbok ni Lucernas ang usa ka Enriquita Despi nga kawani ra usab sa maong buhatan maoy responsable sa pagpatimbang sa maong mga medical equipment ngadto sa usa ka Pardillo Junkshop nga mihalin og P14 mil. Ang maong junkshop nahimutang duol sa buhatan sa SPEED.

Subay sa balaod gikinahanglan nga dunay ipahigayon nga bidding alang sa pagbaligya sa bisan unsang mga butang nga gipanag-iya sa gobyerno.

Wala hinuon moklaro si Osmeña kun temporaryo lang ba ang iyang gimando nga pagpasira sa operasyon sa maong junkshop nga nakapalit sa mga medical equipment sa siyudad o permanente ba kini human unya makanselar ang business permit niini.

Hinuon pagkakaron mihimo usab og imbestigasiyon ang hepe sa SPEED, Vicente Mercado kabahin sa maong panghitabo aron pagtumbok sa responsable sa maong binuang.