2 ka panagatan gisakyag mga armado sigpatan

Duha ka dagkong panagatan ang gisakyan og mga armadong tawo didto sa kadagatan sa Tanguigue Island sakop sa Madredijos sa miaging ala una ang takna sa kaadlawon.

Segun sa report nga midangat sa Provincial Police Office ang grupo ni Eddie dela Cerna ug PO1 Antonio Rayco ilang nasigpatan ang duha ka panagatan nga nanagat duol sa nahisgutang lugar.

Nagtuo ang mga sakop sa Bantay Dagat Composite Team nga ilegal ang ilang pagpanagat hinungdan nga ila kining giadto sakay sa usa ka pumpboat.



Apan pakyas ang maong team sa pagsikop sa mga crew ug sa F/B Stephane ug pagsakmit F/B Saint Peter ug ang kapitan nga nailhan nga si Daking Escala nga taga Kabangbang isla sa Bantayan gumikan kay armado og tag-as nga kalibre sa armas.

Ang duha ka panagatan migamit og superlight nga ten bulbs ug laing usa diha na sa ilawom sa dagat nga gituohang migamit og compressor.

Apan sila dihang nagpaila nga mga sakop sa Bantay Dagat giingong nagdumili sa pagtuman nga dad-on ang ilang usa ka panagatan.

Si Maru ug Tonelete nakatapon na sa F/B Stephane apan ilang nakita ang tulo ka 60 caliber machine gun, tulo ka M16A1rifle, duha ka 45 nga pistola ug napulo ka hand grenade

Misamot ang kahadlok sa mga awtoridad sa dihang ilang nadunggan "if you force to arrest and brought (SIC) our light boat, we have no choice but to engage in a gun duel, kung pugson ninyo pagdala sa Lawis ang light boat magpinusilay kita dinhi".

Si PO2 Danny Alburo nga nahinabi sa Banat News nagkanayon nga sila si Tonelete ug Maru napugos og ambak sa dagat dihang ilang nakit-an ang mga hi-powered nga mga armas.

Wala na makaatraka ang maong team ug nakahukom nga mobalik na lang sa daplin.

Matud ni PO2 Alburo nga mga Ilonggo speaking ang mga crew sa duha ka panagatan gawas lang sa kapitan.

Dako ang pagtuo ni Alburo nga nakabiya na palayo sa lugar ang panagatan human sa ilang gihimong pakisusi sa kadagatan sa Tanguigue.

Dugang pa niya nga magpaabot sila kun unsay ayuda nga ihatag sa labaw'ng buhatan sa Bantay Dagat Commission.